ბრენდების სარეკლამო სტრატეგია
დევიდ ოგილვი: "რაც უფრო მაღალია ფასი, მით უფრო მიმზიდველია საქონელი მომხმარებლის თვალში".
რატომ ანიჭებს მომხმარებელი ბრენდებს უპირატესობას? სათანადოდ შეფუთული პროდუქცია, სარეკლამო სტრატეგია და თამამი ექსპერიმენტი - ბრენდის წარმატებას განაპირობებს.
Alka-Seltzer
გასული საუკუნის 60-იან წლებში, Alka-Seltzer-ის რეკლამირებისას, წყლით სავსე ჭიქაში ერთის ნაცვლად 2 აბის ჩაგდება დაიწყეს, რამაც წამლის გაყიდვები გააორმაგა. ეს სარეკლამო ხრიკი სააგენტო Tinker&Partners-მა მოიფიქრა, უფრო სწორად, "მოჰპარა" გენიალურ მარკეტოლოგს, რომელმაც შამპუნის ანოტაციაში მიუთითა, რომ თმაზე 2-ჯერ უნდა წაესვათ, ამ გზით კი გაყიდვები გაზარდა.
Timberland
XX საუკუნის 80-იანი წლების დასაწყისში Timberland-ს მძიმე დღეები დაუდგა. კომპანია აწარმოებდა ხარისხიან ფეხსაცმელს, რომლის ფასი ამ დარგის ლიდერის - თოპსიდერს-ის ნაწარმზე გაცილებით დაბალი იყო. ხარისხიანი და იაფი ფეხსაცმელი თითქოს მიმზიდველი უნდა გამხდარიყო მომხმარებლისთვის, მაგრამ ასეთმა მიდგომამ არ გაამართლა. საგონებელში ჩავარდნილმა კომპანიამ უცებ მიიღო სარისკო, თუმცა მარტივი გადაწყვეტილება - თოპსიდერს-ზე მეტად გააძვირა ფეხსაცმელი. გაყიდვებმა სწრაფად იმატა, რაც ადასტურებს ოგილვის გამონათქვამის სისწორეს: "რაც უფრო მაღალია ფასი, მით უფრო მიმზიდველია საქონელი მომხმარებლის თვალში".
Pepsi
საბჭოთა კავშირის Pepsi-ს პირველი რეკლამა ნიკიტა ხრუშჩოვმა გაუკეთა. 1959 წელს მოსკოვში, ამერიკის ეროვნულ გამოფენაზე, ვიცე-პრეზიდენტმა რიჩარდ ნიქსონმა ხრუშჩოვს Pepsi შესთავაზა. ფოტომ, სადაც ცკ-ის პირველ მდივანს Pepsi-ს ლოგოიანი ჭიქა უჭირავს, მსოფლიო პრესა მოიარა. ბრენდის ისტორიაში ეს დღე საბჭოთა კავშირში Pepsi-ს "დაბადების დღედ" ითვლება.
Woolworths
მაღაზიათა უმსხვილესი ქსელის, Woolworths-ის დამფუძნებელმა და ფასის მაჩვენებლის გამომგონებელმა უნებლიედ აღმოჩენილი მარკეტინგული სვლით მილიონები იშოვა. 21 წლის მორცხვი, პროვინციელი ბიჭი პატარა მაღაზიაში გამყიდველის თანაშემწედ მოეწყო. იმ დროისთვის პროდუქციას ფასი მითითებული არ ჰქონდა - გამყიდველი კლიენტის შეთვალიერების შემდეგ სახელდახელოდ აწესებდა ფასს. მყიდველი ან ევაჭრებოდა, ან მიდიოდა. გაუბედავი ფრენკი კი კლიენტების მოზიდვას ვერ ახერხებდა. ვაჭრობისას ის ნერვიულობდა, ერთხელ გულიც კი წაუვიდა. მაღაზიის მეპატრონემ ბიჭის დასჯა გადაწყვიტა და მთელი დღით დახლთან მარტო დატოვა, თან გააფრთხილა - თუ მოგება ჩვეულებრივზე დაბალი იქნება, სამსახურიდან გაგაგდებო. შეშინებულმა ფრენკმა ყველა საქონელს სათითაოდ მიაკრა პატარა ფურცელი და საშუალოზე დაბალი ფასი დააწერა. საწყობიდან გამოიტანა ჩაწოლილი პროდუქციაც და მაღაზიის შესასვლელთან დახლზე დააწყო წარწერით: "ყველაფერი 5 ცენტად", თვითონ კი აცახცახებული დახლსუკან მიიმალა... მთელი საქონელი რამდენიმე საათში გაიყიდა, ერთი დღის მოგებამ კი ერთი კვირისას გადააჭარბა. მყიდველები ფასის დანახვისას არც კი ევაჭრებოდნენ, ისე იხდიდნენ ფულს. საზრიანმა ფრენკმა მაღაზია მალევე დატოვა, ფული ისესხა და საკუთარი ჯიხური გახსნა. 1919 წლისთვის Woolworths-ის იმპერია ათასობით მაღაზიისგან შედგებოდა, ფრენკის ქონებამ კი 65 მილიონს მიაღწია.
Dewar’s
მე-19 საუკუნის ბოლოს ლონდონში დიდი პოპულარობით სარგებლობდა ბრენდი, რომი და ჯინი, ვისკის გაყიდვა კი სირთულეს წარმოადგენდა. ოჯახური ბრენდის დამაარსებელმა, მოხერხებულმა ტომას დიუარმა ასეთი სტრატეგია შეიმუშავა: "ცრუ კლიენტებს" აგზავნიდა ლუდხანებსა და ტრაქტირებში, სადაც ისინი ვისკ Dewar’s-ს ითხოვდნენ, რაც მენიუში არ ჰქონდათ. რამდენიმე ასეთი ვიზიტის შემდეგ, თავად დიუარი მიდიოდა ბარში და ვისკის მიწოდებაზე კონტრაქტს სთავაზობდა. 2 წლის განმავლობაში 26 ქვეყანა მოიარა, Dewar’s-ის რეკლამაზე კი 32 აგენტი მუშაობდა. მალე Dewar’s-ის რამდენიმე საექსპორტო კომპანია გაიხსნა. საქონლის ბრუნვა კი 10-ჯერ გაიზარდა.
Camel
ამერიკაში ერთ-ერთი პირველი ტიზერული სარეკლამო კამპანია (პროვოკაციული რეკლამა, სადაც მიზერული ინფორმაციაა სარეკლამო პროდუქტის შესახებ. ტიზერული რეკლამის მიზანია, ხალხის დაინტრიგება, რათა პროდუქტის სასწრაფოდ შეძენის სურვილი გაუჩნდეთ) 1913 წელს თამბაქოს მწარმოებელმა ბრენდმა Camel-მა მოსინჯა. სპეციალისტებმა მიიჩნიეს, რომ აქლემის გამოსახულება დასამახსოვრებელი იქნებოდა და ეს კუზიანი ცხოველი სარეკლამო კამპანიის ჩასატარებლადაც გამოდგებოდა. თამბაქოს სავაჭრო ქსელში გაშვებამდე რამდენიმე დღით ადრე ამერიკის თითქმის 90 ქალაქის გაზეთებსა თუ ჟურნალებში გამოაქვეყნეს განცხადებები. პირველი განცხადება მხოლოდ ერთი სიტყვისგან შედგებოდა - "აქლემები!". მეორე - "აქლემები მოდიან!", შემდეგ - "ხვალ ქალაქში აქლემების შემოსევაა! ისინი აზიასა და აფრიკაში ბინადარ აქლემებზე მეტნი არიან!" მომდევნო დღეს შეშინებულმა და დაინტრიგებულმა მოსახლეობამ, როგორც იქნა, სიმართლე გაიგო - "სიგარეტი სახელწოდებით Camel უკვე ადგილზეა!" - იუწყებოდა უკანასკნელი განცხადება. ეს აქცია იმდენად წარმატებული გამოდგა, რომ თითქმის ყველა მწეველმა შეიძინა სიგარეტი Camel.
ჟურნალი "Top რეიტინგი"