2017 წლის მეორე ნახევრიდან „ქართული სოკო“ პროდუქციას ექსპორტზე გაიტანს.
როგორც „ბიზნესპრესნიუსს“ საწარმოს ხელმძღვანელმა გიორგი ხინჩეგაშვილმა განუცხადა, პროდუქცია თავდაპირველად მხოლოდ სომხეთში გავა.
საწყის ეტაპზე ექსპორტზე 4 000-დან 5 000-მდე ბრიკეტის გატანას აპირებენ.
გიორგი ხინჩეგაშვილის თქმით, ერთი ბრიკეტისგან 6-დან 7 კილომდე სოკოს, კერძოდ, ხის ე.წ. „კალმახა“ სოკოს მიღებაა შესაძლებელი.
„ქართული სოკო“, რომელიც რამდენიმე თვეა მცხეთის რაიონის სოფელ ქსანში ფუნქციონირებს, ძირითადად სოკოს მოსაყვანი მასალის - ბრიკეტების გაყიდვაზეა ორიენტირებული.
„საწარმოს მიერ დამზადებული ბრიკეტი მეწარმეს ფაქტობრივად გამზადებული ბარდება, რომლისგანაც უკვე 2-3 დღეში მოსავლის მიღებაა შესაძლებელი“, - აღნიშნა გიორგი ხინჩეგაშვილმა.
„თეთრ სოკოში“ ამ ეტაპზე 46 ადამიანია დასაქმებული. რაც შეეხება წარმადობას, „ქართული სოკო“ თვეში 28 ათას ბრიკეტს ამზადებს, თუმცა წარმოების 30-35 ათასამდე გაზრდაა დაგეგმილი.
პროექტის ღირებულება ჯამში, მილიონ ნახევარ დოლარს შეადგენს.
თაია არდოტელი