ფერმერებმა საწარმოებში 2438,7 ტონა არასტანდარტული ვაშლი ჩააბარეს

შიდა ქართლში ფერმერები არასტანდარტულ ვაშლს საწარმოებში უკვე აბარებენ.

ამის შესახებ ინფორმაციას სოფლის მეურნეობის პროექტების მართვის სააგენტო ავრცელებს. მათივე ცნობით,  საწარმოებში არასტანდარტული ვაშლის ორგანიზებულად ჩაბარების მიზნით, გორში საკოორდინაციო შტაბი ფუნქციონირებს.

14 სექტემბრის მონაცემებით, შპს "სამეგობრომ" ფერმერებისგან 1141,6 ტონა არასტანდარტული ვაშლი ჩაიბარა, თანხამ კი 114 160 ლარი შეადგინა, სუბსიდიის სახით საწარმო 91 328 ლარს მიიღებს.

არასტანდარტული ვაშლის რეალიზაციის ხელშემწყობ ღონისძიებაში მონაწილეობას სულ ხუთი საწარმო იღებს: შპს "გეოფრუტი", შპს "ნატურალ 7", შპს "ბიოჯუსი", შპს "სამეგობრო" და შპს "ჯეოკონცენტრანტი". 14 სექტემბრის მდგომარეობით, ჯამში, საწარმოებში ფერმერებმა 2438,7 ტონა ვაშლი ჩააბარეს.

პროექტის ფარგლებში, ხილის გადამამუშავებელ კომპანიებზე, რომლებიც მეხილეობის სფეროში დასაქმებული ფიზიკური პირებისგან 1 კგ. არასტანდარტულ ვაშლს არანაკლებ 0.10 ლარად შეისყიდიან, სოფლის მეურნეობის პროექტების მართვის სააგენტო 1 კგ არასტანდარტულ ვაშლზე 0.08 ლარის ოდენობის სუბსიდიას გასცემს.

არასტანდარტული ვაშლის რეალიზაციის ხელშეწყობის პროექტის ბიუჯეტი 3 000 000 ლარს შეადგენს. აღნიშნული პროექტის განხორციელება საქართველოში მეხილეობის დარგის განვითარებას შეუწყობს ხელს.