სურსათის სააგენტომ "თაღლაურა" დახურა

სურსათის ეროვნული სააგენტოს ინსპექტირების დეპარტამენტმა თბილისში, ბელიაშვილის ქუჩაზე მდებარე სახინკლე "თაღლაურა" დახურა.

სააგენტოს ინფორმაციით, სხვა დარღვევებთან ერთად, შპს "თაღლაურა მენეჯმენტ კომპანის" კუთვნილ სახინკლეში ვერ წარმოადგინეს ხორცის კეთილსაიმედოობის დამადასტურებელი დოკუმენტი - ფორმა #2, რის გამოც "თაღლაურა" დაიხურა და შპს "თაღლაურა მენეჯმენტ კომპანი" 1000 ლარით დაჯარიმდა.

"კრიტიკული შეუსაბამობების გამო დაიხურა ასევე რძის პროდუქტების სექცია ახალციხის აგრარულ ბაზარში (შპს "სავაჭრო ცენტრი ახალციხე"), სადაც დარღვეული იყო რძის პროდუქტების (არაჟანი, რძე, კარაქი) შენახვა-რეალიზაციის პირობები, კოროზირებული იყო ხორცის დასაკიდი კაუჭები. ბიზნესოპერატორმა ვერ წარმოადგინა ვეტერინარული მოწმობა ფორმა #2, რის გამოც დაჯარიმდა 1000 ლარით", - აცხადებენ სააგენტოში.

მათივე ინფორმაციით, ფორმა #2-ის გარეშე ხორცის რეალიზაციისა და სხვა დარღვევებისათვის კახეთის რეგიონული სამმართველოს წარმომადგენლებმა საწარმოო პროცესი შეუჩერეს და 1000 ლარით დააჯარიმეს სიღნაღის რაიონის ქალაქ წნორში მდებარე ხორცის სარეალიზაციო ობიექტიც შპს "მარი 97".