"საქართველოს მელიორაციის" კახეთის რეგიონულ სამმართველოს სპეციალური ტექნიკა გადაეცა

სოფლის მეურნეობის მინისტრმა ოთარ დანელიამ კახეთის გუბერნატორ ირაკლი შიოლაშვილთან და "საქართველოს მელიორაციის" გენერალურ დირექტორ ლევან დვალთან ერთად, "საქართველოს მელიორაციის" კახეთის რეგიონულ სამმართველოს ჩინური გრანტის ფარგლებში მიღებული სპეციალური ტექნიკის 44 ერთეული გადასცა.

სოფლის მეურნეობის სამინისტროს ინფორმაციით, აღნიშნული სპეციალური ტექნიკა საექპლუატაციო და სარეაბილიტაციო ღონისძიებების ეფექტიანად და ოპერატიულად განხორციელებას შეუწყობს ხელს. სოფლის მეურნეობის მინისტრმა "საქართველოს მელიორაციის" კახეთის რეგიონული სამმართველოს თანამშრომლებისგან მიმდინარე და დაგეგმილი სამუშაოების შესახებ ინფორმაცია მოისმინა.

2012 წლიდან დღემდე კახეთის რეგიონში სამელიორაციო ინფრასტრუქტურის 19 სარეაბილიტაციო პროექტი განხორციელდა. შედეგად, დამატებით წყალუზრუნველყოფილ იქნა 8 130 ჰექტარი, ხოლო ჭარბი წყლის მოცილება 924 ჰექტარ მიწის ფართობზე მოხდა. დღეისათვის მიმდინარეობს 6 სარეაბილიტაციო პროექტი, რომელთა დასრულების შემდეგ, დამატებით წყალუზრუნველყოფილი იქნება 3 014 ჰექტარი, დაშრობილი კი 3 000 ჰექტარი მიწის ფართობი.

კახეთის რეგიონში მობილური მელიორაციის სამსახურის გადასატანი სატუმბი სადგურებიც ფუნქციონირებს. მობილური მელიორაციის მეშვეობით შესაძლებელი გახდა ისეთი სასოფლო-სამეურნეო ნაკვეთების წყალუზრუნველყოფა, რომლებსაც სარწყავი წყალი სატუმბი ინფრასტრუქტურის განუვითარებლობის გამო არ მიეწოდებოდათ.