ევროკავშირთან უვიზო მიმოსვლით სარგებლობის შესახებ საინფორმაციო ვიდეო-რგოლების ტრანსლირება იწყება
ევროკავშირთან სავიზო რეჟიმის ლიბერალიზაციის სამოქმედო გეგმის (VLAP) მესამე ანგარიშის მოთხოვნის შესაბამისად, საქართველოს მთავრობა ევროკავშირთან უვიზო მიმოსვლით სარგებლობის შესახებ საინფორმაციო კამპანიას ახორციელებს.
ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის აპარატის ცნობით, კამპანია ითვალისწინებს საქართველოს მოსახლეობისთვის ინფორმაციის მიწოდებას იმ შესაძლებლობებსა და ვალდებულებების შესახებ, რომელიც მათ სავიზო რეჟიმის ლიბერალიზაციის წარმატებით დასრულების შემდეგ ექნებათ. "კამპანიის ეფექტიანი განხორციელების მიზნით საქართველოს მთავრობამ სამოქმედო გეგმა შეიმუშავა, რომელიც ქვეყნის მოსახლეობისთვის პირდაპირი კომუნიკაციის გზით უვიზო მიმოსვლით სარგებლობის შესახებ დეტალური ინფორმაციის მიწოდებას ისახავს მიზნად. კამპანიის ერთ-ერთი მნიშვნელოვანი კომპონენტია ბეჭდური, ინტერნეტ და ტელე-რადიო არხებით საინფორმაციო რგოლების გავრცელება. დღეიდან, 3 აგვისტოდან ვიდეო-რგოლების ტრანსლირება მოხდება როგორც ქართულ, ისე აფხაზურ, ოსურ, სომხურ, აზერბაიჯანულ და რუსულ ენებზე", - ნათქვამია უწყების მიერ გავრცელებულ ინფორმაციაში.
უვიზო მიმოსვლით სარგებლობის წესების შესახებ დეტალური ინფორმაცია ხელმისაწვდომია საგარეო საქმეთა სამინისტროს ოფიციალურ ვებ-გვერდზე.