"მჯერა, "აბრეშუმის გზის" პროექტის საშუალებით, საქართველო გახდება მულტირეგიონული ცენტრი"

საქართველოს პრემიერ-მინისტრ ირაკლი ღარიბაშვილის განცხადებით, სჯერა, რომ "აბრეშუმის გზის" პროექტი საქართველოში მეტ ინვესტიციას და მეტ სატაბილურობას მოიტანს.

ამის შესახებ ირაკლი ღარიბაშვილმა ჩინეთის პორტ ლიანუნგიანის ტერმინალიდან გამოსული პირველი სატრანზიტო მატარებლის შემოსვლისადმი მიძღვნილ ღონისძიებაზე განაცხადა.

როგორც პრემიერ-მინისტრმა აღნიშნა, "აბრეშუმის გზა" ეს არის იაფი და ყველაზე მოკლე, ხუთჯერ შემცირებული გზა აზიასა და ევროპას შორის.

"ჩვენი ქვეყანა ამ მარშრუტის უმოკლეს ნაწილს წარმოადგენს. ეს მარშრუტი ჩვენ გვაძლევს დამატებით შანსს, გავხდეთ მსოფლიო ეკონომიკური მოვლენების ერთ-ერთი მნიშვნელოვანი მონაწილე.

"აბრეშუმის გზა" ეს არის ერთ სარტყელში განლაგებული პარტნიორი ქვეყნების დამატებითი ბიძგი, პოლიტიკური, კულტურული, ეკონომიკური ურთიერთობების გაღრმავებისთვის.

მჯერა, რომ ეს პროექტი ჩვენს ქვეყანაში მოიტანს მეტ ინვესტიციას, მეტ სტაბილურობას და მეტ დასაქმებას და კეთილდღეობას ჩვენი მოსახლოებისთვის. მჯერა, რომ "აბრეშუმის გზის" პროექტის საშუალებით, საქართველო გახდება მულტირეგიონული ცენტრი, რომელიც დააკავშირებს ევროპას, აღმოსავლეთ აზიას, ინდოეთს, ცენტრალურ აზიას და შუა აღმოსავლეთს", - განაცხადა ღარიბაშვილმა.

როგორც პრემიერმა აღნიშნა, ეს არის ხელისუფლების გონივრული, პრაგმატული პოლიტიკის გაგრძლება. "სწორედ ასეთი გონივრული პოლიტიკით ჩვენ შეგვიძლია, რომ ჩვენი ქვეყანა გახდეს ძალიან მიმზიდველი ინვესტიციებისთვის და გახდეს მართლაც რეგიონული ჰაბი", - განაცხადა ღარიბაშვილმა.

პრემიერმა მადლობა გადაუხადა ელჩებს, რომლებიც დღევანდელ ღონისძიებას ესწრებოდნენ, "საქართველოს რკინიგზის" ხელმძღვანელ მამუკა ბახტაძეს, მის გუნდს და ყველა რკინიგზელს ამ პროექტის წარმატებით განხორციელებისთვის.

"მინდა ვისარგებლო შემთხვევით და ყველას შეგახსენოთ, რომ 13 ივნისს, თბილისში მომხდარი სტიქიური უბედურების შემდეგ, სარეაბილიტაციო სამუშაოებში აქტიურად ჩაერთნენ ჩვენი რკინიგზელები და მინდა მათ კიდევ ერთხელ მადლობა გადავუხადო", - განაცხადა ირაკლი ღარიბაშვილმა.