დიმიტრი ქუმსიშვილი ისრაელის ქნესეთის ვიცე-სპიკერს შეხვდა
ვიცე-პრემიერი, ეკონომიკისა და მდგრადი განვითარების მინისტრი დიმიტრი ქუმსიშვილი ისრაელის ქნესეთის ვიცე-სპიკერს იეჰილ ბარს შეხვდა. როგორც ეკონომიკისა და მდგრადი განვითარების სამინისტროში აცხადებენ, შეხვედრას ასევე ისრაელის სახელმწიფოს ელჩი საქართველოში იუვალ ფუქსი და საქართველო-ისრაელის ბიზნეს პალატის პრეზიდენტი იციკ მოშე დაესწრნენ.
შეხვედრაზე მხარეებმა ისაუბრეს საქართველო-ისრაელის პარტნიორ ურთიერთობებზე, იმ შესაძლებლობებზე, რომელიც ქვეყნებს შორისაა და ასევე თანამშრომლობის გაღმავებაზე როგორც პოლიტიკური, ისე სავაჭრო-ეკონომიკური მიმართულებებით.
ეკონომიკის სამინისტროს ინფორმაციით, შეხვედრაზე ხაზი გაესვა იმ განსაკუთრებულ ურთიერთობებს, რომელიც საქართველოსა და ისრაელის სახელმწიფოსა და მათ ხალხებს შორის არსებობს. მხარეებმა იმედი გამოთქვეს, რომ აღნიშნული კავშირები ორ ქვეყანას შორის განვითარდება და დადებით შედეგებს მოიტანს როგორც ქართველი, ისე ისრაელის საზოგადოებისთვის.
აღინიშნა, რომ თანამშრომლობის რესურსი, რომელიც ორ ქვეყანას შორის არსებობს, არასაკმარისადაა ათვისებული და მისი სათანადოდ გამოყენება მნიშვნელოვანია.