დიმიტრი ქუმსიშვილი - საქართველოსა და ჩინეთის მონდომება და სურვილები აბსოლუტურად თანხვედრაშია

ჩინეთის მხრიდან მივიღეთ შემოთავაზება, რომ ჩვენი სახელმწიფოს გეგმები დაახლოვებული და განხილული იყოს იმ ხუთწლიან გეგმებთან მიმართებაში, რომელიც ჩინეთის სახალხო რესპუბლიკას აბრეშუმის გზის განვითარების მიმართულებით გააჩნია, - ამის შესახებ ვიცე-პრემიერმა, ეკონომიკისა და მდგრადი განვითარების მინისტრმა დიმიტრი ქუმსიშვილმა მთავრობის ადმინისტრაციაში განაცხადა, სადაც ჩინეთის სახალხო რესპუბლიკის წარმომადგენლებთან შეხვედრა გაიმართა.

როგორც ქუმსიშვილმა აღნიშნა, დღეს საქართველოში სტუმრად იმყოფება ჩინეთის პირველი ვიცე-პრემიერი, რომელიც რანგით ჩინეთში ერთ-ერთი ყველაზე მაღალი სახელმწიფო მოხელეა და შედის ჩინეთის მუდმოვმოქმედ კომიტეტში. ქუმსიშვილის შეფასებით, შეხვედრამ ჩაიარა ძალიან კეთილგანწყობილ, მეგობრულ და ამავე დროს, კონსტრუქციულ ფორმატში.

„ჩვენი მონდომება და სურვილები აბსოლუტურად თანხვედრაშია. ჩინეთის მხრიდან მივიღეთ შემოთავაზებები, მათ შორის, ის, რომ ჩვენი სახელმწიფოს გეგმები ასევე იყოს დაახლოვებული და განხილული იმ ხუთწლიან გეგმებთან მიმართებაში, რომელიც ჩინეთის სახალხო რესპუბლიკას გააჩნია აბრეშუმის გზის განვითარების მიმართულებით, რაც ძალიან მარტივს გახდის შემდგომი გადაწყვეტილებების მიღების პროცედურას. დეტალურად ვისაუბრეთ თავისუფალი ვაჭრობის შესახებ შეთანხმებაზე. ასევე ხელი მოვაწერეთ მემორანდუმს, რომელითაც დავადასტურეთ, რომ ორივე მხარე აქამდე მიღწეულ შეთანხმებებს ეთანხმება და გარდა ამისა, მონდომებულია, რომ რაც შეიძლება მალე მოხდეს თავისუფალი ვაჭრობის შეთანხმების დასრულება. საუბრისას დეტალურად იყო განხილული აბრეშუმის გზის შესაძლებლობები და ის საინვესტიციო პოტენციალი, რომელიც აბრეშუმის გზას გააჩნია. ასევე იყო დეტალური საუბარი ტურიზმზე, ინდუსტრიის განვითარებაზე, ერთობლივი საწარმოების გაკეთებაზე“, - განაცხადა ქუმსიშვილმა.

მისივე თქმით, დღევანდელ შეხვედრაზე კონკრეტულად განიხილეს აბრეშუმის გზის პროექტი, ასევე ინვესტიციებთან, ვაჭრობასთან, ტურიზმთან, თავისუფალ ეკონომიკურ ზონებთან, ერთობლივ საწარმოებთან, ინფრასტრუქტურის განვითარებასა და პოლიტიკურ თანამშრომლობასთან დაკავშირებული საკითხები.

„მინდა მაღალი შეფასება მივცე აღნიშნულ შეხვედრას, რომელმაც უნდა მისცეს ბიძგი ორ ქვეყანას შორის ურთიერთობის გაღრმავებას“, - აღნიშნა ქუმსიშვილმა.