გორში ქარის ელექტროსადგურის ტურბინების დამონტაჟება უახლოეს ხანებში დაიწყება

საქართველოში ქარის პირველი ელექტროსადგურის მშენებლობა მიმდინარეობს.

ამ ეტაპზე, ელექტროსადგური ,,ქართლის” ტურბინების დასამონტაჟებლად გორის მუნიციპალიტეტში შესაბამისი პლატფორმები მზადდება.

,,ამჟამად მიმდინარეობს ბოლო ტურბინის ფუნდამენტის ჩასხმა. ორი დღის წინ ჩამოვიდა ფრთები და გენერატორები, 5-6 აგვისტოსთვის კი ველოდებით კოშკურას. 23 აგვისტოდან დაიწყება მათი აწყობა”, - აღნიშნავს შპს ,,ქართლის ქარის ელექტროსადგურის” დირექტორთა საბჭოს თავმჯდომარე თორნიკე კაზარაშვილი.

მისივე ინფორმაციით, გორის ქარის ელექტროსადგურის დადგმული სიმძლავრე 20,7 მეგავატი იქნება. ის გამოიმუშავებს 88 მილიონ კილოვატსაათ ელექტროენერგიას, რომელიც დაახლოებით, 18-დან 20 ათასი ოჯახის მოხმარებისთვისაა საკმარისი.

პროექტს ევროპის რეკონსტრუქციისა და განვითარების ბანკი 24 მილიონი დოლარით აფინანსებს.

ქრისტინე გამთენაძე

იხილეთ ინგლისური ვერსია The first wind power plant being built in Georgia