2014 წლის პირველი კვარტლის მონაცემებით, ქართული ღვინის ექსპორტმა მსოფლიოს 19 ქვეყანაში, 15 მილიონი ბოთლი შეადგინა.
ამის შესახებ ინფორმაციას ღვინის ეროვნული სააგენტოს თავმჯდომარე, ლევან დავითაშვილი ავრცელებს. მისი თქმით, ეს ციფრი 243%-ით მეტია წინა წლის შესაბამისი პერიოდის ანალოგიურ მაჩვენებლთან.
დავითაშვილის ინფორმაციით, საექსპორტო ბაზრის პირველი ხუთეულია: რუსეთი, უკრაინა, ყაზახეთი, პოლონეთი და ლატვია. აქედან, ექსპორტის მთლიან მოცულობაში რუსეთი 71%-ით ლიდერობს. პირველი კვარტლის მდგომარეობით, ექსპორტირებულია 51 მილიონი აშშ დოლარის პროდუქცია, რაც 290%-ით აღემატება 2013 წლის ანალოგიურ მაჩვენებელს.
ამასთან, პირველ კვარტალში 9 ქვეყანაში ბრენდის ექსპორტმა 3 მილიონზე მეტი ბოთლი შეადგინა. ბრენდის ექსპორტი თანხაში 14 მილონ აშშ დოლარზე მეტია, რაც 113 %-ით აღემატება გასული წლის შესაბამისი პერიოდის მაჩვენებელს.