მარნეულს განახლებული ნაგავსაყრელი მოემსახურება

მარნეულის მუნიციპალიტეტს განახლებული ნაგავსაყრელი მოემსახურება.

რეგიონული განვითარებისა და ინფრასტრუქტურის სამინისტროს ინფორმაციით, მუნიციპალურ ნაგავსაყრელზე ჩატარებული სამუშაოები დღეს მინისტრის მოადგილემ გიორგი კობერიძემ, "საქართველოს მყარი ნარჩენების მართვის კომპანიის" დირექტორმა, გიორგი შუხოშვილმა და ადგილობრივი ხელისუფლების წარმომადგენლებმა დაათვალიერეს.

უწყების პრესსამსახურის ინფორმაციით, რეგიონული განვითარებისა და ინფრასტრუქტურის სამინისტროს, "მყარი ნარჩენების მართვის კომპანიამ", მუნიციპალური ნაგავსაყრელის კეთილმოწყობის მიზნით, ტერიტორიის შემოღობვა განახორციელა, მოაწყო პოლიგონამდე მისასვლელი გზები, წყალარინების არხები, ასევე, მოხდა ტერიტორიის ელექტროფიცირება. პოლიგონზე დამონტაჟდა 60 ტონიანი სასწორი.

მარნეულის ნაგავსაყრელი, რომელიც 8 ჰექტარ ფართობს მოიცავს, ვერ აკმაყოფილებდა ეკოლოგიურ და სანიტარულ ნორმებს, სტანდარტებთან შეუსაბამოდ ოპერირებდა და საფრთხეს უქმნიდა ადგილობრივ მოსახლეობას. რეგიონული განვითარებისა და ინფრასტრუქტურის სამინისტროს ინფორმაციით, განახლებული ნაგავსაყრელის ექსპლუატაციაში შესვლის შემდეგ ნარჩენები სპეციალურად გამოყოფილ უჯრედებში თანამედროვე სტანდარტების შესაბამისად განთავსდება, რაც გარემოზე მავნე ზემოქმედებას მნიშვნელოვნად შეამცირებს. აღსანიშნავია ის ფაქტიც, რომ არაორგანიზებულად განთავსებული ნარჩენები პოლიგონთან ახლოს გამავალ ცენტრალურ საავტომობილო გზას აბინძურებდა.

სამინისტროს ინფორმაციით, პროექტი, რომლის ღირებულება 529.929 ლარია, სახელმწიფო ბიუჯეტის დაფინანსებით, ტენდერში გამარჯვებულმა კომპანიამ - შპს "ლავამ" განახორციელა. სამუშაოებისას ადგილზე 26 ადგილობრივი მოსახლე იყო დასაქმებული.