საქართველო-ლიტვის მთავრობათაშორისი ეკონომიკური კომისიის პირველი სხდომა გაიმართება

უახლოეს მომავალში საქართველო-ლიტვის მთავრობათაშორისი ეკონომიკური კომისიის პირველი სხდომა გაიმართება.

საქართველოს მთავრობის ადმინისტრაციის პრესსამსახურის ინფორმაციით, შესაბამისი შეთანხმება ორი ქვეყნის მთავრობის წევრების გაფართოებულ შეხვედრაზე შედგა, რომელიც დღეს მთავრობის ადმინისტრაციაში გაიმართა. მათივე ცნობით, მხარეებმა სავაჭრო-ეკონომიკური ურთიერთობის განვითარების პერსპექტივებზე იმსჯელეს და აღნიშნეს, რომ ორ ქვეყანას შორის სავაჭრო ბრუნვის ზრდის დინამიკა უნდა შენარჩუნდეს.

"საუბარი შეეხო მნიშვნელოვან რეგიონალურ სატრანსპორტო და ენერგოპროექტებს, რომელთა ერთობლივი განხორციელება ხელს შეუწყობს ქვეყნების სატრანზიტო პოტენციალის გაზრდასა და ახალი ბაზრების ათვისებას. შეხვედრისას ასევე ყურადღება გამახვილდა საქართველოს ევროკავშირთან ინტეგრაციის პროცესსა და ნატო-ში გაწევრიანების საკითხებზე", - აცხადებენ საქართველოს მთავრობის ადმინისტრაციის პრესსამსახურში.