საქართველოს მთავრობის წარმომადგენლები დღეს კიევში უკრაინის ეკონომიკური განვითარებისა და ვაჭრობის მინისტრს შეხვდნენ.
ეკონომიკისა და მდგრადი განვითარების სამინისტროს ინფორმაციით, კიევში გიორგი კვირიკაშვილისა და საქართველოს ვიცე-პრემიერის, ენერგეტიკის მინისტრის კახა კალაძის უკრაინის ეკონომიკური განვითარებისა და ვაჭრობის მინისტრ აივარას აბრომავიჩუსთან შეხვედრა გაიმართა. სამინისტროს ცნობით, შეხვედრამ კონსტრუქციულ და საქმიან გარემოში ჩაიარა. მხარეებმა საქართველოსა და უკრაინას შორის სავაჭრო-ეკონომიკური თანამშრომლობის განვითარების საკითხები განიხილეს. აღინიშნა, რომ 2015 წლის ივნისში ბათუმში გაიმართება ორი ქვეყნის სამთავრობოთაშორისო კომისიის სხდომა, რომელზეც საქართველო-უკრაინის ეკონომიკური კავშირების წახალისების კონკრეტული მიმართულებები განიხილება. გიორგი კვირიკაშვილის განცხადებით, კომისიის სხდომაზე იქნება დასახული კონკრეტული გეგმები, თუ როგორ მოხდება საქართველო-უკრაინას შორის უმნიშვნელოვანესი სტრატეგიულ ურთიერთობათა წახალისება.
შეხვედრაზე ასევე ყურადღება გამახვილდა საქართველოს გამოცდილებაზე ევროკავშირთან სავაჭრო ურთიერთობების განვითარების საკითხზე და დადებითად შეფასდა ის ნაბიჯები, რომელიც ამ მიმართულებით გადაიდგა.