საქართველოში ევროპის საინვესტიციო ბანკის წარმომადგენლობითი ოფისი გაიხსნება
პარლამენტის საფინანსო-საბიუჯეტო კომიტეტმა "საქართველოსა და ევროპის საინვესტიციო ბანკის წარმომადგენლობის ოფისისთვის პრივილეგიების და იმუნიტეტების მინიჭების შესახებ" შეთანხმება განიხილა.
სარატიფიკაციო დოკუმენტი პარლამენტს მთავრობამ წარუდგინა. შეთანხმებით, საქართველოში ევროპის საინვესტიციო ბანკის წარმომადგენლობითი ოფისის დაარსებაა გათვალისწინებული, რომელიც ბანკის საქმიანობას როგორც საქართველოში, ასევე სომხეთსა და აზერბაიჯანშიც უზრუნველყოფს.
შეთანხმების თანახმად, ევროპის საინვესტიციო ბანკის წარმომადგენლობითი ოფისისთვის პრივილეგიებისა და იმუნიტეტების მინიჭებაა გათვალისწინებული. როგორც მომხსენებელმა აღნიშნა, აღნიშნული შეთანხმების გაფორმება საქართველოს საფინანსო-ეკონომიკური თვალსაზრისით დადებით შედეგს მოუტანს.
ევროპის საინვესტიციო ბანკის წარმომადგენლობითი ოფისი მიმდინარე წლის 30 აპრილს გაიხსნება. საფინანსო-საბიუჯეტო კომიტეტმა შეთანხმების რატიფიცირებას მხარი დაუჭირა.