მარტში აჭარაში ტურისტების 21,75%-ით მატება დაფიქსირდა

აჭარის ტურიზმისა და კურორტების დეპარტამენტის მიერ წარმოებული სტატისტიკის მიხედვით, გასული წლის ანალოგიურ პერიოდთან შედარებით, მარტში აჭარაში ტურისტების 21,75 %-იანი ზრდა დაფიქსირდა.

როგორც აჭარის ტურიზმისა და კურორტების დეპარტამენტში აცხადებენ, გასული თვის განმავლობაში, რეგიონს 16 905 ტურისტი, მათ შორის 11 914 უცხოელი და 4 991 შიდა ტურისტი სტუმრობდა.

რაც შეეხება კვარტლის მონაცემებს, დეპარტამენტის ინფორმაციით, იანვარ-მარტის პერიოდში აჭარაში შემოსულ ტურისტთა რაოდენობა წინა წლის ანალოგიურ პერიოდთან შედარებით 5,55% -ითაა გაზრდილი, რაც 27 264 უცხოელ, ხოლო 13 422 შიდა ტურისტს გულისხმობს.

აჭარის ტურიზმისა და კურორტების დეპარტამენტის სტატისტიკა მხოლოდ აჭარაში რეგისტრირებული განთავსების ობიექტების ინფორმაციას ეყრდნობა.

”საზღვრის მონაცემების მიხედვით, საერთაშორისო ვიზიტორთა ზრდის დადებითი ტენდენცია შეინიშნება ბათუმის საერთაშორისო აეროპორტშიც.

მიმდინარე წლის მარტში, ბათუმის საერთაშორისო აეროპორტში გასული წლის ანალოგიურ პერიოდთან შედარებით, უცხოელ ვიზიტორთა 48%-იანი ზრდა დაფიქსირდა. განსაკუთრებული ზრდა კი ისრაელიდან შეინიშნება. გასულ თვეში ბათუმის საერთაშორისო აეროპორტიდან აჭარაში 2015 წლის მარტთან შედარებით 22-ჯერ მეტი ებრაელი ვიზიტორი ჩამოვიდა. რაც შეეხება სარფის საბაჟო-გამშვებ პუნქტს, აქ უცხოელ ვიზიტორთა 10%-იანი მატება შეინიშნება. განსაკუთრებული ზრდა კი ირანიდან შემოსულ ვიზიტორებზეა, რაც გასული წლის ანალოგიურ პერიოდთან შედარებით 21-ჯერ არის გაზრდილი”, - აცხადებენ აჭარის ტურიზმისა და კურორტების დეპარტამენტში.

იხილეთ ვიდეო PALITRANEWS-ზე