ბორჯომის მუნიციპალიტეტში სტიქიით მიყენებული ზარალი ბიუჯეტიდან ანაზღაურდება

სამცხე-ჯავახეთის გუბერნატორის, აკაკი მიჭუტაძის განცხადებით, ბორჯომის მუნიციპალიტეტში სტიქიის შედეგად მიყენებული ზარალი ანაზღაურდება.როგორც მაჭუტაძემ ტელეკომპანია ”იმედს” განუცხადა , ზარალის დამთვლელი კომისია უკვე მუშაობს.

”მუნიციპალიტეტში შექმნილია კომისია. ყველა ლოკაციაზე გასულები არიან. ცოტა მოგვიანებით გვეცოდინება რიცხვი. ყველა ზარალი დადგინდება. დახმარება იქნება ინფრასტრუქტურული კუთხით. ანაზღაურდება ადგილობრივი ბიუჯეტიდან. თუ არ ეყოფა ადგილობრივი ბიუჯეტის სარეზერვო თანხები, მოვიძიებთ ცენტრალური ბიუჯეტის სარეზერვო თანხებიდან”, - განაცხადა მაჭუტაძემ და აღნიშნა, რომ ტურისტული სეზონი ჩვეულ რეჟიმში გაგრძელდება და არანაირი შეფერხება ამ კუთხით არ იქნება.

მისივე თქმით, გუშინ გვიან ღამით, ყველა მიმართულებით გზა გაიხსნა. ”დღეს სრულად გავწმინდეთ გზის მონაკვეთები. ბორჯომის ისტორიულ პარკში ამ დრომდე მიმდინარეობს გაწმენდითი სამუშაოები. დაზიანებულია ლამპიონების აბაჟურები საკმაოდ დიდი რაოდენობის, დაახლოებით 300 ერთეული. პარკის შესასვლელი გადარჩენილია”, - აღნიშნა გუბერნატორმა.