ბიძინა ივანიშვილი - ძალიან მნიშვნელოვანია, რომ ქუთაისში ასეთი უნივერსიტეტის მშენებლობა დაფუძნდა
ძალიან მნიშვნელოვანია, რომ დღეს ასეთი უნივერსიტეტის მშენებლობა დაფუძნდა და წარვუდგინეთ ჩვენს საზოგადოებას , - აღნიშნული განცხადება ყოფილმა პრემიერ-მინისტრმა ბიძინა ივანიშვილმა ქუთაისში, საუნივერსიტეტო ქალაქის დაფუძნებასთან დაკავშირებით გააკეთა.
მისივე თქმით, დღეს მართლაც მნიშვნელოვანი დღეა.
„დღეს ილიას მკვლელობიდან 109-ე წელი გავიდა და ძალიან მნიშვნელოვანია, რომ დღეს ასეთი უნივერსიტეტის მშენებლობა დაფუძნდა და წარვუდგინეთ ჩვენს საზოგადოებას. რამდენიმე თვის წინ ჩვენ დავიწყეთ სამეცნიერო ცენტრის მშენებლობა თბილისში, სადაც კოლაიდერი გაკეთდება და იქ მეგა ცენტრი იქნება, სხვადასხვა დარგის მეცნიერებს ექნებათ საექსპერიმენტო ბაზა. ეს ორივე ერთად საფუძველი იქნება იმისა, რომ საქართველოში მეცნიერება და განათლება აღორძინდეს", - განაცხადა ივანიშვილმა.