მსოფლიოს სამი ყველაზე ძვირად ღირებული წიგნი
პირველი წიგნი, უფრო სწორად კი ნამუშევარი “ლესტერის კოდექსი“ აუქციონზე
44, 6 მილიონ დოლარად გაიყიდა.
სწორედ ამდენით შეფასდა ლეონარდო და ვინჩის ნამუშევარი, რომელზეც მილანში დაახლოებით 1506-1510 წლებში მუშაობდა. რვეული 18 ფურცლისგან შედგება, მაგრამ
შესრულების სირთულესა და უნიკალურობას თუ გავითვალისწინებთ, თავისუფლად
შეიძლება ჩაითვალოს, რომ 72-გვერდიანია.
ასევე საინტერესოა ლეონარდოს ხელწერა - ის სარკისებურია, რაც გულისხმობს იმას, რომ მისი წაკითხვა მხოლოდ სარკის დახმარებითაა შესაძლებელი. ამ ნამუშევარში
ლეონარდო აღწერს სხვადასხვა ბუნებრივ მოვლენას, მაგალითად, რატომ ანათებს მთვარე, ან
რა ნივთიერებებს შეიცავენ სხვადასხვა მინერალები. ნამუშევრის სახელი
პირველი მყიდველის ლესტერისგან გამომდინარეობს, რომელმაც ის 1717
წელს შეიძინა. საბოლოოდ კი ნამუშევრის მფლობელი, "მაიკროსოფტის" დამფუძნებელი
ბილ გეითსი გახდა, რომელმაც ნამუშევარი 1994 წელს აუქციონზე შეიძინა.
მეორე ყველაზე ძვირად ღირებული წიგნი ჰაინრიხ ლომის სახარებაა, რომელიც 1983 წელს 26, 7 მილიონ დოლარად შეფასდა. წიგნი მთლიანად ხელითაა შესრულებული და სავარაუდოდ 1188 წლით თარიღდება. სახარება საქსონიისა და ბავარიის ჰერცოგ ჰაინრიხ ლომის (1129-1195წწ) დაკვეთითაა შესრულებული, რომელზეც ბერები და ეკლესიის მსახურები
მუშაობდნენ. ჰერცოგის გარდაცვალების შემდეგ 226 გვერდიანი ნამუშევარი
დაკარგულად ითვლებოდა, მაგრამ მე-19 საუკუნეში პრაღაში აღმოაჩინეს და 1861
წელს შეიძინა გეორგ V-მ. საბოლოოდ კი გერმანიის ხელისუფლებამ ის 1983 წელს აუქციონზე შეიძინა და გეორგ V-ის სახელობის მუზეუმს გადასცა.
მესამე ადგილზეა უნიკალური წიგნი “ამერიკის ფრინველები“, რომლის ავტორი
ჯონ ჯეიმს ოდიუბონია. წიგნი 1838 წელსაა გამოცემული. ამ პერიოდში
წიგნის 200 ეგზემპლიარი გამოუშვეს. საინტერესოა, რომ წიგნის 127
სმ სიმაღლის 435 გვერდი ხელითაა მოხატული. სხვათა შორის,
ფრინველები დახატულია მათი რეალური ზომების მიხედვით. ჩვენს დრომდე შემონახულია 119
სრული ეგზემპლარი, მათ შორის 108 ინახება სხვადასხვა ბიბლიოთეკებში, დანარჩენები
კი კერძო კოლექციონერების საკუთრებაშია.