ოქტომბერში საზღვარზე გადაადგილებულ ვიზიტორთა მაჩვენებელი 4,5 პროცენტით გაიზარდა

ოქტომბერში საზღვარზე გადაადგილებულ ვიზიტორთა მაჩვენებელი, წინა წლის მაჩვენებელთან შედარებით, 4,5 პროცენტით გაიზარდა. როგორც  შს სამინისტროს საინფორმაციო ანალიტიკური დეპარტამენტიდან იუწყებიან, 2016 წლის ოქტომბერი 527 157 ვიზიტით განისაზღვრა, რაც 2015 წლის იგივე პერიოდის მაჩვენებელზე 4,5 %-ით მეტია.

დეპარტამენტის მონაცემებით, იანვარ-ოქტომბრის ინტერვალში ქვეყანაში უკვე 5 406 188 ვიზიტი განხორციელდა, რაც 8,1%-ით მეტია 2015 წლის ანალოგიური საანგარიშო პერიოდის მაჩვენებელზე. რაც შეეხება ტურისტულ ვიზიტს, 2 372 351-ით განისაზღვრა, რაც 2015 წლის იგივე პერიოდის მაჩვენებელზე 19,7%-ით მეტია. ამასთან, შემოღებული პირობითი დაყოფის მიხედვით, 2016 წლის ოქტომბერში ხვედრითი წილის ურთიერთმიმართება შემდეგია: ტურისტი - 215 620 ვიზიტი (საერთო რაოდენობის 40,9%, მატება წინა წლის ანალოგიურ მაჩვენებელთან 20,9%), ტრანზიტი - 121 511 ვიზიტი (საერთო რაოდენობის 23%, კლება წლის ანალოგიურ მაჩვენებელთან -6,6%), სხვა - 190 026 ვიზიტი (საერთო რაოდენობის 36,1%, კლება წინა წლის ანალოგიურ მაჩვენებელთან -3%).

2016 წლის ოქტომბერშიც ყველაზე მეტი ვიზიტი კვლავ სომხეთიდან (-2,1%), აზერბაიჯანიდან (+10,1%), თურქეთიდან (-16,6%), რუსეთიდან (+13%), უკრაინიდან (+15,8%) და ირანიდან (+344,3%) განხორციელდა. ასევე, პოზიტიური ტენდენცია ნარჩუნდება ევროკავშირის ქვეყნების მიმართულებიდან, საიდანაც საქართველოში ჩამოსვლების რაოდენობის ზრდის კუთხით, იანვარ-ოქტომბერშიც გამოირჩნენ ლატვია, ლიტვა, გერმანია და იტალია (შესაბამისად 27%, 12%, 8%, და 7%), შუა აზიის ქვეყნებიდან - ყაზახეთი (35%). აღმოსავლეთ ევროპის ქვეყნებიდან - ბელორუსი (30%), ახლო აღმოსავლეთიდან - ისრაელი (59%), ხოლო აზიის ქვეყნებიდან - არაბთა გაერთიანებული საემიროები 13%-იანი მატებით. აქვე აღსანიშნავია ამერიკის შეერთებული შტატების მოქალაქეების 10%-იანი ზრდა.

იხილეთ ვიდეო PALITRATV-ზე