როგორ „იბადებოდნენ“ ცნობილი ბრენდები?

ცნობები ცნობილი სამარკო ნიშნების დაარსების შესახებ ყოველთვის დიდ ინტერესს იწვევს. ჩვენ უკვე შემოგთავაზეთ მითები და ლეგენდები რამდენიმე მსოფლიო ბრენდის შესახებ, თუმცა მათი ჩამონათვალი საკმაოდ ბევრია და ბევრია ასეთი საინტერესო ამბავი მათი შექმნის შესახებ. ამჯერად კიდევ რამდენიმე საერთაშორისო სამარკო ნიშნის შესახებ ყველაზე ცნობილ ლეგენდას გაგაცნობთ.

Nestlé

თავდაპირველად, კომპანია Nestlé-ს (კომპანია მე-19 საუკუნის 60-იან წლებში დაარსდა) ლოგოტიპი შემდეგნაირად გამოიყურებოდა: ბუდეში მოთავსებული სამი ბარტყი დედასთან ერთად. ანრი ნესტლე კომპანიის გამოშვებული პირველი პროდუქტების სავაჭრო ნიშნად საგვარეულო გერბს იყენებდა. იმ დროისთვის ტრადიციულ ოჯახად ითვლებოდა მშობლები და სამი შვილი. მოგვიანებით, მე-20 საუკუნის შუა წლებში, ტრადიციები შეიცვალა. შეიცვალა ლოგოტიპიც. დღესდღეობით, ბუდეში მხოლოდ ორი ბარტყია.

Ariel

არსებობს ლეგენდა, რომ ე.წ. casual fridays, როდესაც მსხვილი კომპანიების მკაცრ ე. წ დრესკოდს თანამშრომლები ერთი დღით ივიწყებენ და ოფიციალურ სამოსს ყოველდღიურით ანაცვლებენ, კომპანია P&G-მ შემოიღო. მე-20 საუკუნის 80-იან წლებში მსოფლიო უმსხვილესი კომპანია P&G შეერთებული შტატებში სარეცხი საშუალებების ბაზრის ლიდერი გახლდათ. მაგრამ, მიუხედავად მაღალი სარეკლამო აქტივობისა, ბაზრის წილი არ იზრდებოდა. სწორედ მაშინ, კომპანიამ ჩაატარა კვლევა და შეაფასა ტანსაცმლის მოვლის ბაზარი. გაირკვა, რომ ფხვნილს 65%-ით იყენებენ, ქიმწმენდას კი - 35%-ით. შემდგომ, კომპანიამ დაადგინა, რომ მომხმარებელთა 70% დაქირავებული მოსამსახურეა და 7-დან 5 დღის განმავლობაში ატარებენ კოსტუმს, რომელსაც შემდეგ ქიმწმენდაში აბარებენ. P&G-სა და Levi Strauss Jeans-ის ერთობლივი კვლევის მიხედვით, თანამშრომლები ყოველდღიურ სამოსში მეტად შრომისუნარიანები და კრეატიულები არიან, ვიდრე ოფიციალურ კოსტუმებში. და რა მოიმოქმედეს მათ? P&G-მა კომპანიაში თანამშრომლებს პარასკევობით თავისუფალ ტანისამოსში სიარულის ნება დართო. ეს ახალი ამბავი 2-ვე კომპანიის ძალისხმევით პრესის ფურცლებს მოედო და მათ მრავალმა კორპორაციამ მიბაძა. სარეცხი საშუალებების ბაზარი კი 20%-ით გაიზარდა.

Pirelli

იტალიური კომპანია Pirelli გამოირჩევა თავისი პროდუქციის მაღალი ხარისხით და სპეციალიზირდება საავტომობილო საბურავების, მაღალვოლტიანი და ტელესაკომუნიკაციო კაბელების გამოშვებაზე. თუცა, ბევრისთვის Pirelli ასოცირდება კალენდართან, რომელზეც ლამაზი მოდელები არიან გამოსახული. Pirelli-ს კალენდარი - კომპანიის მარკეტოლოგების სწორი გათვლის შედეგია, რისი წყალობითაც, ფირმას ფართო აღიარება, ახალი კლიენტები და ბაზარზე წარმატება ხვდა წილად. Pirelli-ს კალენდარი მე-20 საუკუნის საუკეთესო სარეკლამო სვლად და ხელოვნების ნიმუშად ითვლება. 2002 წელს კომპანიამ 40 წლიანი ტრადიცია დაარღვია და ცნობილი კალენდარი გახდილის ნაცვლად, ჩაცმული მოდელების გამოსახულებით გამოუშვა. გარეკანზე ამერიკის იმდროინდელი პრეზიდენტის, ჯორჯ ბუშის 17 წლის ძმისშვილი - ლორენ ბუში იყო გამოსახული. ბედნიერი გოგონა ჟურნალისტებს ემოციებს უზიარებდა: ”ველაპარაკე ბებიას და ბაბუას, ისინი კმაყოფილები დარჩნენ. როდესაც ვუთხარი, რომ ტანსაცმელში ვიპოზიორებდი - კიდევ უფრო გაუხარდათ”.

Hewlett-Packard

HP-ს დამფუძნებლებმა ბილ ჰიულეტმა და დეივ პაკარდმა მონეტა ისროლეს იმის გადასაწყვეტად, თუ ვისი სახელი იქნებოდა კომპანიის სახელწოდების დასაწყისში. როგორც მიხვდით, გაიმარჯვა ბილმა.

Absolut

Absolut-ის კონცეფცია - ეს ყველაზე ხანგრძლივი კამპანიაა რეკლამის ისტორიაში, რომელიც კარგი გემოვნებისა და კრეატიულობის ეტალონი გახდა. თავდაპირველად, შორეულ 1979 წელს, შვედური ბრენდის სარეკლამო კონცეფციები, რომელიც მარკეტოლოგებმა შეიმუშავეს, ცდილობდნენ ხაზი გაესვათ მარკის შვედური წარმოშობისთვის. ერთ-ერთი ვერსიით, არყისთვის უნდოდათ დაერქმიათ ”ქერა შვებედის სასმისი”, ეტიკეტზე კი, ვიკინგები გამოესახათ. მეორე ვერსიით - ”სამეფო კარის არაყი”, ეტიკეტზე ნისლით დაფარული დოქის გამოსახულებით. ასევე, იყო შემოთავაზება, ბოთლები ქაღალდში შეეხვიათ. თუმცა, არცერთი იდეა არ ქმნიდა არყის ხარისხსა და წარმომავლობაზე სათანადო წარმოდგენას. გადაწყვეტილება ბოთლის ფორმის შერჩევის შემდეგ მიიღეს. რეკლამის სპეციალისტმა, გუნარ ბრომანმა სტოკჰოლმში, ანტიკვარული მაღაზიის ვიტრინაში შვედური სააფთიაქო ბოთლი შეამჩნია. იგი ელეგანტური, არასტანდარტული, მარტივი და ძალზედ ”შვედური” იყო. რამდენიმე დიზაინერს დაავალეს, ბოთლის ფორმა ბოლომდე დაემუშავებინათ, რის შემდეგაც გადაწყვიტეს, ეტიკეტზე საერთოდ უარი ეთქვათ, ბოთლის კრისტალურად სუფთა შემცველობა რომ არ დაეფარათ.

Heinz

ამ მარკის კეტჩუპის ყიდვისას, ყურადღება მიაქციეთ წარწერას ზედა ნაწილში - "57 Varieties" (57 სახეობა). არსებობს მითი, რომ 1896 წლის ზაფხულში, 51 წლის ჰენრი ჰაინცმა (იმ მომენტისთვის რამდენიმე ფაბრიკის მფლობელი) ნიუ იორკის ქუჩებში სეირნობისას შენიშნა ფეხსაცმლის მაღაზიის რეკლამა, რომელიც კლიენტებს სთავაზობდა ”21 სტილის ფეხსაცმელს”. ჰაინცმა, ანალოგიურად გადაწყვიტა თავისი ფაბრიკების მიერ წარმოებული პროდუქციის სახეობათა რაოდენობა დაეთვალა. ”57-ზე გაცილებით მეტი პროდუქცია დავითვალე, მაგრამ თავში სწორედ ”57” მიტრიალებდა, - იხსენებდა ჰენრი ჰაინცი. – 7-იანს ისეთი ფსიქოლოგიური მომხიბვლელობა გააჩნდა, რომ ”58” ან ”59” სრულებით არ მიზიდავდა”. ამ ამბის შემდეგ ზუსტად 1 კვირაში ეტიკეტებსა და Heinz-ის

სარეკლამო პროდუქციებში გაჩნდა სწორედ ის "57 Varieties".

Red Bull

ენერგეტიკული სასმელი Red Bull 1982 წელს შეიქმნა, როდესაც აღმოსავლეთ აზიაში მივლინებით მყოფი დიტრიხ მატეშიცი იქ უკვე ფართოდ გავრცელებული ენერგეტიკული სასმელებით დაინტერესდა. მატეშიცმა ტაილანდური მარკის Krating Daeng (წითელი ხარი ტაილანდურად) და Taisho Pharmaceuticals (იაპონია) ფარმაცევტული რეცეპტის ლიცენზიები შეიძინა. როდესაც სასმელი ევროპისა და ამერიკის ბაზარზე გაჰქონდათ, მას უკვე ჰყავდა მსგავსი კონცეფციის მქონე კონკურენტები - Cola, Pepsi, Molson, Labatt და Anheuser-Busch. კონცეფცია ყველას ერთგვარი ჰქონდა - მასტიმულირებელი და მატონიზირებელი, ენერგეტიკი Jolt Cola კი, Red Bull-თან შედარებით ორჯერ მეტ კოფეინს შეიცავდა. მაშინ, დიტრიხ მატეშიცმა სარისკო ნაბიჯი გადადგა: ხელოვნურად გაზარდა ფასი და ქილის მოცულობა შეამცირა, პროდუქცია კი, მაღაზიებში სხვა ყველა განყოფილებებში განათავსა, გარდა სასმელებისა. ამის გარდა, Red Bull-ის ყუთები უფასოდ ურიგდებოდა სტუდენტებს საუნივერსიტეტო კამპუსებში. სტუდენტურ წვეულებებზე Red Bull-ი დიდი მოთხოვნით სარგებლობდა, რადგან მალევე აღმოჩნდა, რომ იგი იდეალურად უხდება არაყს. ასე გაჩნდა ახალი, მეტად პოპულარული კოქტეილი Vodka Red Bull.

დუდანა ზაქარაია