იყალთოს მონასტრის მიმდებარედ ტურისტული ინფრასტრუქტურის მოწყობის სამუშაოები მიმდინარეობს
იყალთოს მონასტრის მიმდებარედ ტურისტული ინფრასტრუქტურის მოწყობის სამუშაოები მიმდინარეობს. როგორც რეგიონული განვითარებისა და ინფრასტრუქტურის სამინისტროში განაცხადეს, იყალთოს მონასტერთან ტურისტული ინფრასტრუქტურის სარეაბილიტაციო სამუშაოები რეგიონული განვითარებისა და ინფრასტრუქტურის სამინისტროს მუნიციპალური განვითარების ფონდის აღმასრულებელმა დირექტორმა, ჯუანშერ ბურჭულაძემ დაათვალიერა.
პროექტი, რომელსაც მუნიციპალური განვითარების ფონდი მსოფლიო ბანკის დაფინანსებით ახორციელებს, კულტურული მემკვიდრეობის ძეგლთან საინფორმაციო ცენტრების, სუვენირების მაღაზიის, სველი წერტილების, ობიექტებამდე მისასვლელი გზისა და ავტოსადგომების მოწყობას ითვალისწინებს. პარალელურად, სარეაბილიტაციო სამუშაოები ძველი და ახალი შუამთის მონასტრებთანაც მიმდინარეობს და მათი საერთო ღირებულება 2 182 000 ლარია.
პროექტის მიზანი კულტურული მემკვიდრეობის ძეგლების შენარჩუნებასა და საქართველოში ტურისტული ინფრასტრუქტურის განვითარებაში წვლილის შეტანაა.
სამუშაოებზე 60-მდე ადამიანია დასაქმებული და მათი უმეტესობა ადგილობრივი მოსახლეა. სამუშაოები 2015 წელს დაიწყო მიმდინარე წლის ბოლოს დასრულდება.