ლუკაშენკო მობილიზაციას მხოლოდ კარტოფილის ასაღებად აცხადებს

ბელარუსის პრეზიდენტი, ალექსანდრე ლუკაშენკო მობილიზაციას აცხადებს, თუმცა მხოლოდ კარტოფილის ასაღებად. ინფორმაციას „ბელტა“ ავრცელებს.

ლუკაშენკო ამბობს, რომ ქვეყანას ყველა მოქალაქის მობილიზება კარტოფილის, ჭარხლის, სიმინდისა და მარცვლეულის მოსავლის ასაღებად სჭირდება.

„არ მივიღებ საუბრებს იმაზე, რომ სადღაც სანქციებია, რაღაც მობილიზაცია, ომი და კიდევ ბევრი სხვა რამეა. დაივიწყეთ ეს ყველაფერი და მიხედეთ თქვენს რაიონებს, თქვენს ხალხს. დროულად დათესეთ, ზამთარი გადააგორეთ, გუთანი მოიმარჯვეთ და მოემზადეთ საგაზაფხულო თესვისთვის,“ - განაცხადა ლუკაშენკომ რაიონული აღმასკომების ხელმძღვანელების დანშვნის დროს.

მიუხედავად იმისა, რომ ქვეყნის ზოგიერთ საგანმანათლებლო დაწესებულებაში აგრარულ სამუშაოებში სკოლის მოსწავლეების ჩართვა აკრძალულია, ლუკაშენკომ რეგიონების მმართველებს, საჭიროების შემთხვევაში, მოსავლის აღების პროცესში მოსწავლეების ჩართვისკენ მოუწოდა.

მან ხაზგასმით აღნიშნა, რომ ბავშვისთვის დღეში ხუთიდან ექვს საათამდე მუშაობა „კარგი ფიზიკური მომზადება“ იქნება, რითიც მშობლებიც კმაყოფილი იქნებიან. მისი შეფასებით, მეტად პოზიტიური იყო წინა წლების გამოცდილება, როცა მოზარდები სასოფლო-სამეურნეო საწარმოებს მოსავლის აღებაში ეხმარებოდნენ და რამაც კოლექტივის განმტკიცებასა და შრომის სიყვარულში წვლილი შეიტანა.

სექტემბრის დასაწყისში ალექსანდრე ლუკაშენკომ განაცხადა, რომ „მისი სიზმარი 8,2 მილიონი ტონა მარცვლეულის მოსავლის მიღებაზე მალე აუხდება, რადგან ქვეყანაში უკვე 8 მილიონ 50 ათასი ტონა მარცვლეული იქნა აღებული“.

მოამზადა ლადო სულაბერიძემ