2022 წლის 9 თვეში თბილისში უძრავი ქონების გაყიდვები 21%-ით გაიზარდა - Colliers Georgia
მხოლოდ სექტემბრის მონაცემებით, გასულ თვეში, თბილისში ახალაშენებულ მედიუმ სეგმენტის ბინებზე მოთხოვნა გაორმაგდა, პრემიუმ სეგმენტში მაჩვენებელი 167%-ით გაიზარდა, ეკონომ სეგმენტში კი ზრდა 5% იყო - ამის შესახებ Colliers Georgia-ს კვლევაშია წერია.
გასულ თვეს ახალ პროექტებში ტრანზაქციების 29%-იანი ზრდა დაფიქსირდა. ძველ პროექტებში კი მაჩვენებელი 22%-ით გაიზარდა.
სექტემბერში, თბილისში სულ 3 831 საცხოვრებელი ბინა გაიყიდა და წინა წლის სექტემბერთან შედარებით 27%-იანი ზრდა დაფიქსირდა. ბაზრის ზომა კი 42%-ით, 196 მილიონ აშშ დოლარამდე გაიზარდა.
Colliers Georgia-ს ინფორმაციით, სექტემბერში ახალაშენებული ბინების საშუალო შეწონილი გასაყიდი ფასი ქალაქის ცენტრში 16%-ით გაიზარდა, ფართო ცენტრში - 15%-ით, გარეუბნებში კი - 11%-ით. რაც შეეხება ძველ ბინებს, მათი საშუალო შეწონილი გასაყიდი ფასი, გარეუბნებში 10%-ით გაიზარდა, ქალაქის ცენტრსა და ფართო ცენტრში კი 9%-იანი ზრდა დაფიქსირდა.
რაც შეეხება 9 თვის ჭრილს. 2022 წლის იანვარ-სექტემბერში, თბილისში 31 023 საცხოვრებელი ბინა გაიყიდა. წლიური ზრდა 21%-ია. 2021 წლის ანალოგიურ პერიოდთან შედარებით, ბაზრის ზომა 35%-ით, 1.5 მლრდ დოლარამდე გაიზარდა.
იანვარ-სექტემბერში თბილისში ახალაშენებულ მედიუმ სეგმენტის ბინებზე მოთხოვნა გაორმაგდა, პრემიუმ სეგმენტში კი მაჩვენებელი 137%-ით გაიზარდა. რაც შეეხება ეკონომ სეგმენტს, ტრანზაქციების რაოდენობა მხოლოდ 5%-ით გაიზარდა.
მიმდინარე წლის პირველ 9 თვეში თბილისში ახალ პროექტებში ტრანზაქციების 24%-იანი ზრდა დაფიქსირდა. ძველ პროექტებში კი მაჩვენებელი 16%-ით გაიზარდა.
კვლევითი ორგანიზაციის ინფორმაციით, 9 თვეში ახალაშენებული ბინების საშუალო შეწონილი გასაყიდი ფასი თბილისის ცენტრსა და ფართო ცენტრში 11%-ითაა გაზრდილი, გარეუბნებში კი 9%-იანი ზრდა დაფიქსირდა. ამასთან, ძველი ბინების საშუალო შეწონილი გასაყიდი ფასი 8%-ით გაიზარდა გარეუბნებში, ქალაქის ცენტრსა და ფართო ცენტრში კი ზრდის მაჩვენებელი 7% იყო.
