„მივიღებთ, ძალიან დიდ ნაკადს იმ ქვეყნებიდან, სადაც ჩვენზე დაბალია ცხოვრების დონე და ხელფასები - მოხდება სამუშაო ძალის ჩანაცვლება“
„მივიღებთ, ძალიან დიდ ნაკადს იმ ქვეყნებიდან, სადაც ჩვენზე დაბალია ცხოვრების დონე და ხელფასები - მოხდება სამუშაო ძალის ჩანაცვლება,“ - ამის შესახებ ბიზნეს ასოციაციის აღმასრულებელმა დირექტორმა ლევან ვეფხვაძემ განაცხადა რადიო „პალიტრასა“ და „პალიტრანიუსის“ გადაცემაში „საქმე“.
გადაცემაში ვეფხვაძემ საქართველოში სამუშაო ძალისა და კვალიფიციური კადრების დეფიციტზე ისაუბრა.
„თანამშრომლების გადამზადებისა და კვალიფიციური კადრების მიღების თვალსაზრისით, სახელმწიფო და ბიზნესმა ორმხრივად უნდა იმუშაოს. ბიზნესს, კომპანიებს თვითონ აქვთ ტრენინგ-ცენტრები, ბევრმა პროფესიული სასწავლებელიც გააკეთა და იქ რესურსს ხარჯავენ კადრების გადამზადებისთვის. ბოლო 15 წელია სახელმწიფო არასწორი გზით მიდიოდა და ეს უკვე ვაღიარეთ, რომ არასწორი იყო, როცა ბიზნესთან დამოუკიდებლად იღებდა კვალიფიკაციებზე, სტანდარტებსა თუ სპეციალობებზე გადაწყვეტილებებს. ამ მიმართულებით უკვე დაიწყო ბიზნესთან კონსულტაციები. პრემიერთან შეხვედრაზეც გამოითქვა სურვილი პრემიერის მხრიდან რომ გაგრძელდეს შეხვედრები ამ კუთხით. ალბათ ეს იქნება გრძელვადიანი თავის ტკივილი, რომელსაც დღესვე რამე უნდა მოვიფიქროთ და ვუშველოთ. წინააღმდეგ შემთხვევაში საბოლოო ჯამში მივიღებთ, ძალიან დიდ ნაკადს იმ ქვეყნებიდან, სადაც ჩვენზე დაბალია ცხოვრების დონე და ხელფასები. თუ შემოვა სამუშაო ძალა, ასეთი ქვეყნებიდან შემოვა, თორე დასავლეთ ევროპიდან, გერმანიიდან საფრანგეთიდან საქართველოში სამუშაოდ არავინ ჩამოვა. შედეგად, მივიღებთ სამუშაო ძალის ჩანაცვლებას. ეს პროცესი გარდაუვალი იქნება, თუ ადგილზე არ იქნება სამუშაო ძალა, იმისათვის, რომ სამუშაო შესრულდეს,“- განაცხადა ვეფხვაძემ.
