ტერესა მორეირა - ზრდისა და განვითარების მიმართულებით საქართველო სწორ გზაზე დგას

UNCTAD-ის კონკურენციისა და მომხმარებელთა პოლიტიკის მიმართულების ხელმძღვანელი, ტერესა მორეირას განცხადებით, საქართველო აქტიურად მუშაობს ბიზნესისთვის თანაბარი შესაძლებლობების მომცემი გარემოს შესაქმნელად, რაც ხელს შეუწყობს ქვეყნის მდგრად განვითარებას.

კონკურენციის სააგენტოს ინფორმაციით, ამის შესახებ ტერესა მორეირამ "შერატონ მეტეხი პალასში" კონკურენციისა და მომხმარებელთა უფლებების შესახებ მიმდინარე საერთაშორისო კონფერენციაზე სიტყვით გამოვლისას განაცხადა და ისაუბრა იმ მიღწევებზე, რომელიც აღნიშნულ სფეროში საქართველოს აქვს.

UNCTAD-ის კონკურენციისა და მომხმარებელთა პოლიტიკის მიმართულების ხელმძღვანელმა საქართველოს ხუთ მარეგულირებელ უწყებას ნაყოფიერი თანამშრომლობისთვის მადლობა გადაუხადა და განაცხადა, რომ ასეთი ერთიანობა არც თუ ისე ხშირია.

მისივე თქმით, ეს ძალიან მაღალი სტანდარტის მაჩვენებელია.

"ჩემთვის ძალიან დიდი პატივია, რომ მომეცა შესაძლებლობა ჩამოვსულიყავი თბილისში და მხარი დამეჭირა იმ სამუშაოებისთვის, რომელიც კონკურენციის შესახებ კანონში შესატან ცვლილებებთან დაკავშირებით შესრულდა. მინდა, მადლობა გადავუხადო დღევანდელი კონფერენციის ორგანიზატორებს და ვთქვა, რომ ასეთი თანამშრომლობა არც თუ ისე ხშირია. დღეს საქართველოში აქტიურად მუშაობთ იმისათვის, რომ შექმნათ თანაბარი შესაძლებლობების მომცემი ბიზნესგარემო, რომელიც თავის მხრივ ხელს შეუწყობს ქვეყნის მდგრად განვითარებას. ეს ყველაფერი ძალიან მნიშვნელოვანია როგორც ბიზნესისთვის, ასევე მოქალაქეებისთვის. შემიძლია ვთქვა, რომ საქართველო ზრდისა და განვითარების მიმართულებით სწორ გზაზე დგას" , - განაცხადა ტერესა მორეირამ.