ბოლო 24 საათში კრიპტოვალუტებმა შემცირებული ფასები მცირედით აღიდგინეს - Bitcoin-ის ღირებულება 5.2%-ით, 16,500 დოლარამდე გაიზარდა. მცირედით გაძვირების მიუხედავად, საბაზრო კაპიტალიზაციით უმსხვილესი კრიპტოვალუტის ფასი მაინც მკვეთრად დაკლებულია და 5 ნოემბრის შემდეგ 24.5%-ითაა გაუფასურებული.
საქმე იმაშია, რომ ციფრული ვალუტების ფასზე ნეგატიურად აისახა რიგით მეორე კრიპტობირჟის, FTX-ის გაკოტრება.
როგორც ცნობილი იყო, FTX-ის შეძენას Binance აპირებდა მისი ცუდი ფინანსური მდგომარეობის გამო, თუმცა საბოლოოდ გადაწყვეტილება შეიცვალა და Binance-ის მფლობელებმა სემ ბენქმენ-ფრიდის FTX-ის შეძენა ბიზნეს საქმიანობასთან დაკავშირებული ეჭვებისა და აშშ-ს საფინანსო მარეგულირებლების მიერ გამოძიების გამო გადაიფიქრეს.
ამჟამად გაკოტრების საფრთხის წინაშე პლატფორმა Genesis Global-ია, რომელიც ერთგვარი ბანკის ფუნქციას ასრულებს კრიპტოინდუსტრიაში. კომპანიამ უკვე განუცხადა ინვესტორებს, რომ თუ 1 მილიონი დოლარის კაპიტალის მობილიზებას ვერ შეძლებს, გაკოტრების გამოცხადება მოუწევს.
Genesis-ის ლიკვიდურობის კრიზისის მიზეზი, თავის მხრივ, FTX-ის მოულოდნელი ჩამოშლაა, რომლის სავაჭრო ანგარიშზეც კომპანიას 175 მილიონი დოლარი ჰქონდა განთავსებული.
Genesis კრიპტოსამყაროს სტაბილურობის ერთ-ერთ საზომად ითვლება და მისი პრობლემები მთლიანი ინდუსტრიის მდგომარეობასაც ასახავს. შესაბამისად, კრიზისი ერთი კომპანიიდან მეორეზე სწრაფად და ჯაჭვურად ვრცელდება.
გთავაზობთ 10 უმსხვილესი კრიპტოვალუტის ფასის ცვლილებას ბოლო 24 საათში: