ევროკავშირი ფრენების დროს მობილური მოწყობილობების გამოყენებას აკანონებს
ევროკომისია, განახლებული ციფრული სტრატეგიის ფარგლებში, 5G სიხშირეების იდენტიფიცირების წინადადებით გამოდის, რაც ფრენების დროს მობილური ტელეფონებისა და სხვა ქსელური მოწყობილობების გამოყენების საშუალებას იძლევა. ინფორმაციას El Pais ავრცელებს.
ავიაკომპანიები კლიენტებს სატელეფონო ზარების და ტექსტური შეტყობინებების განხორციელების, მიღების, ასევე, მონაცემთა ისეთივე გამოყენების უფლებას მისცემენ, როგორც ამას მომხმარებლები მიწაზე აკეთებენ. სერვისი განხორციელდება სპეციალური ქსელური მოწყობილობით, სახელწოდებით, „pico-cell,“ რომელიც თვითმფრინავის ბორტსისტემას სატელიტის საშუალებით მიწასთან აკავშირებს.
„ცა აღარ არის ზღვარი, როცა საქმე ულტრასწრაფი და მაღალგამტარუნარიანობის კომუნიკაციის საშუალებებს შეეხება,“ - აცხადებს ევროკომისარი შიდა ბაზრის საკითხებში, ტიერი ბრეტონი.
ევროკომისიის გადაწყვეტილება არ ნიშნავს, რომ თვითმფრინავში ტელეფონების გამოყენება უფასო იქნება. ფიჭური კომპანიები და ავიახაზები, სავარაუდოდ, სპეციალურ ტარიფს შემოიღებენ, რადგან კავშირი შესაძლოა, რამდენიმე ქვეყნის ქსელთან დაკავშირებას მოიცავდეს, რაც როუმინგის ხარჯებს წარმოქმნის. ამასთან, ავიაკომპანიებს მოუწევთ დიდი ინვესტიციის ჩადება აღჭურვილობაში, რომელიც სახმელეთო მობილურ ქსელს თვითმფრინავთან ფრენის დროს დააკავშირებს.
ამჟამინდელი წესით, ევროკავშირის მიმართულებით ფრენის დროს მგზავრებმა მობილური ტელეფონები უნდა გამორთონ ან აფრენამდე და ფრენის განმავლობაში თვითმფრინავის რეჟიმი გაააქტიურონ. ეს პრაქტიკა არის უსაფრთხოების ზომა, რომ თვითმფრინავის ელექტრო და სატელეკომუნიკაციო სისტემის მუშაობაში ჩარევა არ მოხდეს. უკაბელო მოწყობილობებით, როგორიც არის მობილური ტელეფონები, ტაბლეტები და ლეპტოპები, ინტერნეტთან დაკავშირება მხოლოდ ავიაკომპანიის მიერ შეთავაზებული შიდა Wi-Fi ქსელის მეშვეობით არის შესაძლებელი, რაც, როგორც წესი, ფასიანი სერვისია.
ევროკომისიას ახალი წესი საავტომობილო ტრანსპორტისთვისაც შემოაქვს: 5 გჰც სიხშირის დიაპაზონის Wi-Fi მანქანებში, ავტობუსებსა და სხვა სატრანსპორტო საშუალებებში იმუშავებს.
ევროკომისიის მიერ გამოცხადებული წინადადებები ძალაში არაუგვიანეს 2023 წლის 30 ივნისამდე შევა.
მოამზადა ლადო სულაბერიძემ