რომეო მიქაუტაძე ბალკანეთისა და შავი ზღვის ფორუმში მონაწილეობს

ეკონომიკისა და მდგრადი განვითარების მინისტრის მოადგილე რომეო მიქაუტაძე ბალკანეთისა და შავი ზღვის ფორუმში მონაწილეობს, რომელიც საბერძნეთის დედაქალაქ ათენში მიმდინარეობს.

ეკონომიკისა და მდგრადი განვითარების სამინისტროს ინფორმაციით, ფორუმის მთავარი თემებია ენერგიის მიწოდება, უსაფრთხოება და გარემოს დაცვა, ასევე, საუბარი ინოვაციებსა და ტექნოლოგიებზე, ინფრასტრუქტურულ გამოწვევებზე, ინვესტიციების ზრდის საჭიროებებსა და საბანკო ინდუსტრიაზე წარიმართება.

უწყების ცნობითვე, მინისტრის მოადგილემ ფორუმის ფარგლებში გამართულ პანელზე პრეზენტაცია გააკეთა, რომელიც ინოვაციების, ტექნოლოგიების, დაფინანსებისა და ინვესტიციების საკითხებს მიეძღვნა.

„რომეო მიქაუტაძემ დეტალურად ისაუბრა საქართველოში ენერგეტიკულ უსაფრთხოებასთან დაკავშირებულ გამოწვევებსა და გადაჭრის გზებზე, ასევე, ქვეყნის სატრანზიტო პოტენციალზე როგორც ელექტროენერგეტიკული ისე ნახშირწყალბადების ტრანსპორტირების თვალსაზრისით.

მინისტრის მოადგილემ განსაკუთრებული აქცენტი განახლებადი ენერგიების მდგრად და ინტენსიურ ათვისებაზე, აგრეთვე ახალი ტექნოლოგიების განვითარებასა და სტრატეგიული ინფრასტრუქტურული პროექტების განხორციელებაზე გააკეთა, განსაკუთრებით, შავი ზღვის ენერგო კაბელის პროექტზე, რომელიც საქართველოსა და შესაბამისად, სამხრეთ კავკასიის ენერგეტიკულ სისტემას ევროკავშირისას დააკავშირებს.

ბალკანეთისა და შავი ზღვის ფორუმი არის ფლაგმანი ეკონომიკური პლატფორმა და მთავარი სამიტი წამყვანი ბიზნესებისა და პოლიტიკოსებისათვის, რომელთა მიზანია, გააძლიერონ სტაბილურობა, ეკონომიკური ზრდა და თანამშრომლობა ბალკანეთისა და შავი ზღვის რეგიონებში. წლევანდელი ფორუმის სლოგანია „ევრაზიული კავშირი 2022 შემდეგ: უსაფრთხოების, ვაჭრობისა და ინვესტიციების მაღალი ფსონების ასპარეზი“, - აღნიშნულია გავრცელებულ ინფორმაციაში.