"ნოემბერში ტურიზმისა და გზავნილების კვლავ ძლიერი დინამიკა დაფიქსირდა" - „თიბისი კაპიტალი“

„ნოემბერში ტურიზმისა და გზავნილების კვლავ ძლიერი დინამიკა დაფიქსირდა", - ამის შესახებ „თიბისი კაპიტალის“ მიმოხილვაშია ნათქვამი.

„კერძოდ, ტურისტული შემოსავლები, მიგრაციის ეფექტის ჩათლით, 2019 წლის იმავე თვის 151%-ს გაუტოლდა მაშინ, როდესაც წინა თვეში ანალოგიური მაჩვენებელი 126%-ს შეადგენდა. გზავნილების მხრივ, აღსანიშნავია, რომ შემოდინებები რუსეთის კონტრიბუციის შესაბამისი შესწორების შემდეგაც ძალზედ მაღალი იყო. ექსპორტისა და იმპორტის მხრივ, წინა თვესთან შედარებით საგარეო ვაჭრობამ იმატა, თუმცა საერთო ტენდენციას უფრო ზომიერი შეიძლება ეწოდოს, რაც ძირითადად საერთაშორისო სასაქონლო ფასების ნორმალიზების შედეგია“- წერია დასკვნაში.

ამასთან, როგორც მიმოხილვაშია ნათქვამი, ექსპორტის, იმპორტის, ტურისტული შემოდინებებისა და გზავნილების ბალანსი ნოემბერში გაუარესდა, თუმცა უფრო სეზონური ფაქტორების გამორიცხვის გარეშე.

„თავისთავად, ჩვენი მოლოდინების შესაბამისად, ამას ლარზე უარყოფითად არ უმოქმედია. ასევე, ეროვნული ბანკის საერთაშორისო რეზერვების ზრდაც, აშშ დოლარის შესყიდვის მიმართულებით საკმაოდ მასშტაბური ინტერვენციების ფონზე, სიახლეს არ წარმოადგენს. ისევე, როგორც მე-3 კვარტალში დაფიქსირებული საშუალო ხელფასის 16.5%-იანი მატება, რაც ჩვენი აზრით, მომავალ წელს, ეკონომიკის ზრდისა და ინფლაციის დანორმალიზებასთან ერთად, უფრო ზომიერი ნიშნულით განისაზღვრება. შესაბამისად, თიბისი კაპიტალის პროგნოზი მონეტარული პოლიტიკის განაკვეთის მარტში პირველ შემცირებასთან და მანამდე უცვლელად დატოვებასთან დაკავშირებით სადღეისოდაც უცვლელია“, - ნათქვამია „თიბისი კაპიტალის“ მიმოხილვაში.