მილიარდერები, რომლებმაც რუსეთის მოქალაქეობაზე უარი თქვეს

ომის დაწყების შემდეგ, სულ მცირე ხუთმა მსხვილმა ბიზნესმენმა გამოიყენა რუსეთის მოქალაქეობაზე უარის თქმის უფლება. ხუთეულში პირველი ფინანსისტი ტიმურ ტურლოვია. Freedom-ის დამფუძნებელი ყაზახეთის მოქალაქე 2022 წლის ზაფხულში გახდა, რასაც წინ უძღოდა რუსეთის პასპორტზე უარის თქმა. მას მოჰყვა „ტროიკა დიალოგის“ ყოფილი ხელმძღვანელი რუბენ ვარდანიანი, ინვესტორი ტექნოლოგიების სექტორში იური მილნერი, გადახდის სერვისის Revolut-ის შემქმნელი ნიკოლაი სტორონსკი და ყოფილი ბანკირი ოლეგ ტინკოვი.

ბიზნესმენების ქონება დათვლილია 2022 წლის Forbes-ის რეიტინგის მიხედვით. მასში ვარდანიანი და ტინკოვი ვერ მოხვდნენ, მათი მდგომარეობა 5 ნოემბერს შეფასდა.

ტიმურ ტურლოვი, ჰოლდინგ Freedom-ის დამფუძნებელი და მთავარი მფლობელი

ადგილი რეიტინგში: 36-ე

წმინდა ქონება: 2,4 მილიარდი დოლარი

უარის მიზეზები: 2022 წლის ივნისის დასაწყისში ბიზნესმენმა გამოაცხადა, რომ მან მიიღო ყაზახეთის პასპორტი.

„აქ თავისუფლად ვსუნთქავ და მე მჯერა, რომ ყაზახეთი თავისი მშვიდობიანი და სტუმართმოყვარე პოლიტიკის წყალობით შეძლებს ახალი, უფრო მდიდარი, ეფექტური, სამართლიანი სახელმწიფოს აშენებას“, - დაწერა მან Facebook-ის საკუთარ გვერდზე. როგორც ტურლოვის წარმომადგენელმა მოგვიანებით განმარტა, სხვა სახელმწიფოების პასპორტებზე უარის თქმა ყაზახეთის პასპორტის მიღების წინაპირობაა. ამიტომ, მილიარდერს უნდა წარმოედგინა დოკუმენტები როგორც რუსეთის, ასევე სენტ კიტსისა და ნევისის მოქალაქეობაზე უარის თქმის შესახებ.

საინვესტიციო კომპანია „ტროიკა დიალოგის“ დამფუძნებელი რუბენ ვარდანიანი

ქონება : 1.3 მილიარდი დოლარი

უარის მიზეზები: სექტემბრის დასაწყისში რუბენ ვარდანიანმა გამოაცხადა გადაწყვეტილება რუსეთის მოქალაქეობაზე უარის თქმისა და მთიან ყარაბაღში გადასვლის შესახებ. ვარდანიანმა თავისი ნაბიჯი ახსნა ადგილობრივი მოსახლეობის მხარდაჭერის სურვილით, რომლებიც "რთულ ფსიქოლოგიურ მდგომარეობაში არიან". „ჩვენ ყველაფერი უნდა გავაკეთოთ იმისთვის, რომ არცა იყოს ძლიერი, უსაფრთხო, განვითარებული და ბედნიერი, რომ ის გახდეს ერთ-ერთი მსოფლიო ცენტრი და სომხების ცენტრი“, - განაცხადა მან.

მთიანი ყარაბაღი არაღიარებული სახელმწიფოა ამიერკავკასიაში, რომელსაც სომხეთი თავის რეგიონად მიიჩნევს. აზერბაიჯანი კი თავის ტერიტორიად აცხადებს. 2020 წლის შემოდგომაზე რეგიონში ფართომასშტაბიანი საომარი მოქმედებები განახლდა, ​​რომელიც ზავით დასრულდა.

2021 წლის ივნისში ბიზნესმენმა სომხური პასპორტი მიიღო. სხვა სახელმწიფოების პასპორტების არარსებობა წინაპირობაა მათთვის, ვინც ქვეყანაში რაიმე სამთავრობო თანამდებობას განაცხადებს. ნოემბერში ვარდანიანი ყარაბაღის მთავრობის მეთაურად (სახელმწიფო მინისტრად) დაინიშნა.

იური მილნერი, საინვესტიციო კომპანია DST Global-ის დამფუძნებელი

ადგილი რეიტინგში: მე-15

წმინდა ქონება: 7,3 მილიარდი დოლარი

უარის მიზეზები: მილიარდერმა ოფიციალურად არ დაასახელა რუსულ პასპორტზე უარის თქმის მიზეზები, მაგრამ საჯაროდ გამოთქვა უთანხმოება რუსეთის საგარეო პოლიტიკასთან. „მე და ჩემმა ოჯახმა სამუდამოდ დავტოვეთ რუსეთი 2014 წელს, რუსეთის მიერ ყირიმის ანექსიის შემდეგ. და ამ ზაფხულს ჩვენ ოფიციალურად დავასრულეთ რუსეთის მოქალაქეობაზე უარის თქმის პროცესი“, - განუცხადა მან თავის მიმდევრებს Twitter-ზე. მილნერი ინარჩუნებს ისრაელის პასპორტს და 2011 წლიდან შეერთებულ შტატებში ცხოვრობს.

მეუღლესთან ერთად მილიარდერმა უკრაინელი ლტოლვილების დასახმარებლად 100 მილიონი დოლარის შემოწირულობის პირობაც დადო.

Revolut-ის დამფუძნებელი ნიკოლაი სტორონსკი

ადგილი რეიტინგში: მე-16

წმინდა ქონება: 7,1 მილიარდი დოლარი

უარის მიზეზები: ოქტომბრის ბოლოს Revolut-ის სპიკერმა განაცხადა, რომ ნიკოლაი სტორონსკიმ ცოტა ხნის წინ, უარი თქვა რუსეთის მოქალაქეობაზე. ოფიციალურად, ამ გადაწყვეტილების მიზეზები არ იყო ახსნილი, მაგრამ Forbes-თან ინტერვიუში Revolut-ის წარმომადგენელმა გაიხსენა, რომ ომის დაწყების შემდეგ კომპანია დაეხმარა თავის უკრაინელ თანამშრომლებს, გადასულიყვნენ სხვა ქვეყნებში ან რეგიონებში, ასევე დახურეს ოფისები რუსეთში.

მილიარდერის რუსულ პასპორტზე უარის თქმის განცხადებას წინ უძღოდა უკრაინის მიერ მისი მამის, „გაზპრომ პრომგაზის“ გენერალური დირექტორის, ნიკოლაი სტორონსკის წინააღმდეგ სანქციების დაწესება. Revolut-ის წარმომადგენელმა Forbes-ის კომენტარში ხაზგასმით აღნიშნა, რომ სტორონსკიმ უარი თქვა რუსულ პასპორტზე მამის წინააღმდეგ სანქციების დაწესებამდე. სტორონსკი უმცროსს ბრიტანული პასპორტი აქვს.

Tinkoff Group-ის დამფუძნებელი ოლეგ ტინკოვი

ქონება : 0,86 მილიარდი დოლარი

უარის მიზეზები: ოქტომბრის ბოლოს ოლეგ ტინკოვმა განაცხადა, რომ მან უარი თქვა რუსეთის მოქალაქეობაზე „ინსტაგრამის“ საკუთარ გვერდზე შესაბამისი დოკუმენტის გამოქვეყნებით. მან განმარტა, რომ ეწინააღმდეგება რუსეთის ქმედებებს უკრაინაში და არ სურს იყოს დაკავშირებული იმასთან, რაც ხდება და ასევე მოუწოდა სხვა რუს ბიზნესმენებს, მიბაძონ მის მაგალითს.

მეორე დღეს ყოფილი ბანკირის პოსტი სოციალური ქსელიდან გაქრა. თავის კომენტარში მან განაცხადა, რომ პოსტის მოხსნის მიზეზი ტროლების თავდასხმა გახდა. ამჟამად ბიზნესმენს კვიპროსის პასპორტი აქვს.

ცნობისათვის, მოქალაქეობაზე უარის თქმა არატრივიალური პროცედურაა, მაგრამ საკმაოდ განხორციელებადი. რუსეთის პასპორტზე უარის თქმის მიზნით, პირი უნდა აკმაყოფილებდეს შემდეგ მოთხოვნებს:

• არ გქონდეს სახელმწიფოს ვალი;
• ჰქონდეს სხვა ქვეყნის პასპორტი ან მისი მოპოვების გარანტია;
• წარადგინოს განცხადება და გადაიხადოს სახელმწიფო გადასახადი 3500 რუბლის ოდენობით.

თუ მოქალაქე ცხოვრობს რუსეთში, ეს პროცესი შეიძლება გაგრძელდეს ერთ წლამდე, თუ მის გარეთ - ექვს თვემდე.