მოსახლეობის საყოველთაო აღწერა 2024 წელს თანამედროვე ტექნოლოგიების გამოყენებით ჩატარდება
სტატისტიკის ეროვნული სამსახურის აღმასრულებელი დირექტორის გოგიტა თოდრაძის განცხადებით, მოსახლეობის საყოველთაო აღწერა, რომელიც 2024 წელსაა დაანონსებული, თანამედროვე ტექნოლოგიების გამოყენებით ჩატარდება.
როგორც გოგიტა თოდრაძემ აღნიშნა, თავდაპირველად თვითრეგისტრაციის მეთოდი იქნება გამოყენებული, შემდეგ კი მონაცემების შეგროვება პლანშეტური კომპიუტერების საშუალებით მოხდება.
„როგორც იცით, მოსახლეობის საყოველთაო აღწერის თარიღი დადგინდა. ეს ჩატარდება 2024 წლის 14 ნოემბრიდან - 19 დეკემბრის პერიოდში. ამ აღწერისთვის ჩვენ უარს ვამბობთ ტრადიციული მეთოდის გამოყენებაზე და თანამედროვე ტექნოლოგიებს გამოვიყენებთ. ანუ პირველი ორი კვირის განმავლობაში, მონაცემთა შეგროვება დაიწყება თვითრეგისტრაციის მეთოდის გამოყენებით და შემდეგ გაგრძელდება ე.წ. კაპის მეთოდით, ანუ პლანშეტური კომპიუტერების გამოყენებით მონაცემთა შეგროვების გზით.
ამასთან, „საქსტატის“ ბიუჯეტი 2023 წლისთვის გაზრდილია 13 მლნ-დან 21 მილიონამდე. ზრდა, ძირითადად, განპირობებულია იმით, რომ აქტიურ ფაზაში შედის მოსახლეობის აღწერის მოსამზადებელი სამუშაოები და 6.5 მლნ ლარი მოდის მოსამზადებელ სამუშაოებზე. ასევე, როგორც ყველა საჯარო უწყებაში, ჩვენც გავზარდეთ დასაქმებულთა შრომის ანაზღაურება“, - განაცხადა თოდრაძემ.