უძრავი ქონების ბიზნესი მთავრობის კვლევას უპირისპირდება

"კომერციული და საცხოვრებელი ფართების როგორც ყიდვა, ასევე გაქირავება თითქმის გაჩერებულია"

საქართველოში უძრავი ქონების ბაზრის კვლევის შედეგებს ექსპერტებისა და დილერების უმეტესობა არ ენდობა. ისინი არ იზიარებენ მოსაზრებას, რომ ბაზარზე პოზიტიური ტენდენციებია. სპეციალისტების შეფასებით, ჩატარებული კვლევა უძრავი ქონების ბაზრის რეალობასთან შეუსაბამოა. იანვარ-თებერვალი უძრავი ქონების ბაზარზე აბსოლუტურად ნეგატიური იყო და მდგომარეობის გაუმჯობესების მცირე შესაძლებლობაც არ გამოკვეთილა.

საქართველოში უძრავი ქონების ბაზრის პირველი კვლევა სამინისტროს, თბილისის მერიისა და საპარტნიორო ფონდის დაკვეთით, Colliers International-მა ჩაატარა. იგი, ძირითადად, აქცენტირებულია თბილისზე, რადგან ინვესტორების ფოკუსირება სწორედ დედაქალაქზე ხდება.

კვლევის ავტორთა ინფორმაციით, თვალსაჩინოა შესაძლებლობები უძრავი ქონების თითქმის ყველა სექტორში. კერძოდ, იზრდება საოფისე ფართების ბაზრისთვის მიწოდება. "2017 წლისთვის დაგეგმილია საოფისე ფართების მთლიანი მიწოდების 17,7%-იანი ზრდა. მიმდინარეობს რამდენიმე მსხვილი სავაჭრო ცენტრის მშენებლობა, რაც 2016 წლის ბოლომდე თანამედროვე სავაჭრო ფართების მიწოდებას 50%-ით გაზრდის. სასტუმროების ბაზარს შესაძლებლობა აქვს მოიზიდოს საშუალო და მაღალი კლასის საერთაშორისო ოპერატორები მზარდი ტურისტების ნაკადის დასაკმაყოფილებლად, რაც ბოლო 5 წლის განმავლობაში წელიწადში, საშუალოდ, 23,5%-ით იზრდებოდა. რეკრეაციული ტურისტული ბაზრის ზრდა, თავის მხრივ, ხელს უწყობს კვების ინდუსტრიის, კინოთეატრების, საოჯახო და გასართობი ცენტრების განვითარებას. საცხოვრებელი უძრავი ქონების ბაზარზე მოსალოდნელია მოთხოვნის ზრდა უმეტესად თბილისის გარეუბნებში", - აღნიშნულია კვლევაში.

ამ დოკუმენტის მიხედვით, საკმაოდ პოზიტიური ტენდენციებია სხვადასხვა მიმართულებით, რასაც ეკონომიკის სამინისტროშიც ადასტურებენ. აბსოლუტურად საპირისპირო ვითარებაზე საუბრობენ დილერები. ისინი იანვარ-თებერვლის მდგომარეობას უმძიმესს უწოდებენ.

კომპანია "ბერუკას" წარმომადგენელი ავთანდილ გუგეშაშვილი ამბობს, რომ ბოლო ერთი კვირაა, უძრავი ქონების ბაზარი უმნიშვნელოდ გამოცოცხლდა, მაგრამ, ბუნებრივია, ეს პერიოდი კვლევაში ვერ მოხვდებოდა. რაც შეეხება წინა ორ თვეს, მისი შეფასებით, მდგომარეობა საგანგაშოა.

"ვერ გეტყვით, რას ეყრდნობა კვლევა და რის საფუძველზე გაკეთდა დასკვნა. რეალურად გაცილებით მძიმე სიტუაციაა და ბაზარს ბოლო რამდენიმე თვის განმავლობაში სასიკეთო ნიშან-წყალი არ დასტყობია. განსაკუთრებით რთული იყო იანვარ-თებერვალი. ამ მონაცემებით, რასაც უძრავი ქონების სააგენტოები ვფლობთ, ბაზარზე მოთხოვნა მინიმალურადაა შემცირებული. ამ პერიოდში კომერციული და საცხოვრებელი ფართების როგორც ყიდვა, ასევე გაქირავება თითქმის გაჩერებული იყო. გადაუჭარბებლად შემიძლია თქმა, რომ მდგომარეობა ნამდვილად საგანგაშოა. არანაირი მოთხოვნა არ დაფიქსირებულა საოფისე ფართებზე იჯარის მიმართულებით, ყიდვაზე ხომ საუბარიც ზედმეტია. უფრო მეტად ცენტრალურ უბნებზე გვიწევს მუშაობა, სადაც ძვირადღირებულ სეგმენტში საცხოვრებელ და კომერციულ ფართებზე მოთხოვნა მინიმუმამდეა შემცირებული. უფრო მეტად 50-60 000-დოლარიანი ბინები იყიდება. რაც შეეხება ფასს, 1 კვ/მ ფართის ღირებულება არის 800 დოლარიდან და ზემოთ. ამ თანხის ფარგლებში ფართის რეალიზაცია სერიოზულად ჭირს. დღესდღეობით ბაზრის პრობლემა ისაა, რომ მოთხოვნა მიწოდების ბალანსი მნიშვნელოვნადაა დარღვეული. გასაყიდი ბევრია, მაგრამ რეალურად მყიდველის დეფიციტი შეინიშნება", - ამბობს გუგეშაშვილი.

იგი სავაჭრო ცენტრების მომრავლებაზეც საუბრობს და მიიჩნევს, რომ დედაქალაქი არ არის მზად ასეთი მასშტაბური ცენტრების მშენებლობისთვის. მიზეზად კი უკვე მოქმედ სავაჭრო ცენტრებში არსებულ პრობლემას ასახელებს.

"ბოლო დროს თბილისში ბევრი სავაჭრო ცენტრი აშენდა, რომელთა საჭიროებასაც მე პირადად, ვერ ვხედავ. მით უმეტეს, სავაჭრო ნაგებობები შენდება ისეთ უბნებში, სადაც მათ მუშაობა რეალურად გაუჭირდებათ. მაღაზიები მეტ-ნაკლებად ახერხებენ თავის გატანას, მაგრამ სავაჭრო ცენტრებში განთავსებული საოფისე ფართების ათვისება სერიოზული პრობლემაა. ვინც უკვე იყიდა საოფისე ფართი, ვერ აქირავებს და იძულებულია გაყიდოს. მაგალითად, პრობლემა აქვთ დადიანის ქუჩაზე მდებარე სავაჭრო ცენტრ "ქარვასლაში" განთავსებული კომერციული ობიექტების მფლობელებს. ფართებს იჯარით ვერ ტვირთავენ და ყიდიან. ბოლო დროს ამ სავაჭრო ცენტრიდან რამდენიმე შეკვეთა მივიღეთ. სხვა გამოსავალი არ აქვთ. ეს კი დამატებით ქმნის პრობლემას, რადგან ბაზარზე რეალური მყიდველი არ არის. ვფიქრობ, გაზაფხულიდან უძრავი ქონების ბაზარი გამოცოცხლდება. სასიკეთო ნიშანი გაჩნდა კიდეც. დოლარის კურსის შედარებით დასტაბილურებამ მომხმარებელი ცოტათი გაააქტიურა. ამჯერად ვსაუბრობ ბოლო ერთი კვირის მოვლენებზე, რაც კვლევასთან არაფერ კავშირშია", - აცხადებს გუგეშაშვილი.

"ჯეოფლათის" წარმომადგენელი გიო გამყრელიძე "რეზონანსთან" საუბრისას აღნიშნავს, რომ მოთხოვნა მეტ-ნაკლებად გარეუბნებში შენარჩუნდა, თუმცა ძვირადღირებული ბინების გაყიდვა იქაც ჭირს.

"პოზიტიურ ნიშნებს, ძალიანაც რომ მოვინდომო, ვერ დავინახავ იმდენად მძიმეა მდგომარეობა. გასაყიდი ბინა ბევრია, მაგრამ არ გვყავს რეალური მყიდველი. ძნელად დასაჯერებელია, მაგრამ ზოგჯერ მთელი თვე ისე გავა, 2 ბინის გაყიდვას ვერ ვახერხებთ. ზოგიერთი სახლი კი თვეობით არის გაჩერებული. ასეთი მდგომარეობა ბაზრისთვის ძალიან ცუდი ტენდენციაა", - ამბობს გიო გამყრელიძე.

უძრავი ქონების სააგენტო "კიბეს" ხელმძღვანელი ნელი გოგუაძე, კოლეგებისგან განსხვავებით, საქართველოში ჩატარებული კვლევის შედეგს რეალურ მდგომარეობასთან შესაბამისად მიიჩნევს. ის აცხადებს, რომ ბაზარზე პოზიტიური მომენტი გაჩნდა და ასეთ ტენდენციას ბაზარი უახლოესი რამდენიმე თვის განმავლობაშიც შეინარჩუნებს.

"შემიძლია გითხრათ, რომ ბაზარი გააქტიურდა, სიტუაცია გაცილებით უკეთესია, ვიდრე რამდენიმე თვის წინათ იყო. მართალია, იანვარმა ჩვენ საქმიანობაში საკმაოდ რთულად ჩაიარა, მაგრამ თებერვალში მდგომარეობა საგრძნობლად გამოსწორდა. გააქტიურდა კომერციული სექტორიც, როგორც ქირის, ასევე ყიდვის თვალსაზრისითაც, სიტუაცია შეიცვალა. მოთხოვნა გაჩნდა რესტორნებსა და სასტუმროებზე, აქამდე ამ მხრივ სრული უძრაობა იყო. შეიმჩნევა ინტერესი საცხოვრებელ ფართზეც - 1 თვის განმავლობაში თბილისის ცენტრალურ უბანში 2 ბინა გავყიდეთ. არსებული საფინანსო კრიზისის ფონზე ეს ნორმალური შედეგია", - ამბობს ნელი გოგუაძე.

მარი ჩიტაია

წყარო: გაზეთი "რეზონანსი"