საქართველოს ყველაზე ძვირადღირებული სასტუმროს ნომერი

ძვირადღირებულ ნომრებში, როგორც წესი, ხშირად საკუთარი სტატუსის ხაზგასასმელად ცხოვრობენ.

რა შეიძლება გააკეთოს ადამიანმა საქართველოში 2 250 დოლარად? - პასუხი მარტივია: საკმაოდ ბევრი რამ - მიიღოს კარგი განათლება საქართველოს რომელიმე უმაღლეს სასწავლებელში, იყიდოს მანქანა, იმოგზაუროს უცხო ქვეყანაში, შეიძინოს უამრავი საჭირო ნივთი ან ამ თანხით ერთი ღამე გაატაროს საქართველოს რომელიმე ძვირადღირებული სასტუმროს ძვირადღირებულ ნომერში.

როგორ ფიქრობთ, რა ღირს სასტუმროს ყველაზე ძვირადღირებული ნომერი საქართველოში?

bpn.ge ამ თემით დაინტერესდა და რამდენიმე სასტუმროს ადმინისტრაციას დაუკავშირდა.

როგორც აღმოჩნდა, ფასები რამდენიმე ათასს აჭარბებს. "შერატონ ბათუმში" ყველაზე ძვირადღირებულ ნომერში ერთი ღამის ღირებულება 2 250 დოლარს შეადგენს. როგორც სასტუმროში აცხადებენ, ნომრის მთელი ხიბლი მის ხედებშია - ოთახიდან იშლება პანორამული ხედი, საიდანაც მთელი ბათუმის ნახვაა შესაძლებელი. სასტუმროს მენეჯერის თქმით, ამ ნომერში უამრავი ცნობილი ადამიანი გაჩერებულა, მათ შორის რობერტო კავალი, სტინგი, ენრიკე იგლესიასი, ანდრია ბოჩელი, მონაკოს პრინცი, აშშ-ის საპრეზიდენტო კანდიდატი ჰილარი კლინტონი და ბევრი სხვა.

ბათუმის სასტუმროების ფასებს არც თბილისის სასტუმროები ჩამორჩება. სასტუმრო "რადისონ ბლუ ივერიაში" საპრეზიდენტო კლასის ნომრის ღირებულება 1 200 დოლარია. 18%-იანი დღგ-ს ჩათვლით კი ფასი 1 416 დოლარს შეადგენს. ერთ-ერთი ძვირადღირებული სასტუმროს ნომრის მომსახურებაში დილის საუზმე, სპა და ფიტნეს ცენტრი შედის.

როგორც "რედისონ ბლუ ივერიას" მენეჯერმა ირინე პეტრიაშვილმა გვითხრა, სასტუმროში ძვირადღირებულ ნომერზე მოთხოვნა უმეტესად, უცხოელი ტურისტების მხრიდან არის.

თბილისის ხედი იშლება "თბილისი მარიოტის" საპრეზიდენტო აპარტამენტიდან. აპარტამენტის ფართობი 139კვ. მეტრია, ფასი კი 1 450 დოლარს შეადგენს. როგორც სასტუმროს მენეჯერმა გვითხრა, "თბილისი მარიოტის" საპრეზიდენტო ნომერში არაერთი ქვეყნის პირველი პირი გაჩერებულა, მათ შორის, აშშ-ის ყოფილი პრეზიდენტი ჯორჯ ბუში.

სასტუმროში ორი საპრეზიდენტო ნომერია, რომელიც სამ პერსონაზეა გათვლილი. ნომრის მომსახურებაში შედის დილის საუზმე, ყავა და ჩაი ტკბილეულით. როგორც სასტუმროში აცხადებენ, მოთხოვნა მაღალია როგორც ქართველი, ასევე, უცხოელი ტურისტების მხრიდან. 400 დოლარი ღირს ბათუმის "რადისონში" ახალდაქორწინებულთათვის სპეციალურად შექმნილი სპა ჯუნიორი. ნომერში, საიდანაც ზღვის ხედი იშლება, ორთქლის აბაზანაა განთავსებული. როგორც "ბათუმი რადისონის" მენეჯერმა გვითხრა, ნომერში იდეალური გარემოა შექმნილი წყვილებისთვის, რომლებიც აქ თავს კომფორტულად იგრძნობენ.

თითქმის ყველა სასტუმროს მენეჯერი კი ერთხმად აღნიშნავს, რომ საქართველოში ასეთ ძვირადღირებულ ნომრებში, როგორც წესი, ხშირად საკუთარი სტატუსის ხაზგასასმელად ცხოვრობენ.

თიკო გურაშვილი

იხილეთ ფოტოგალერეა