სეზონის მიწურულს საქართველოში მარწყვზე მოთხოვნა კვლავ მაღალია - რა ღირს პროდუქტი ბაზარზე
საქართველოში კახეთის ადგილობრივი ჯიშის მარწყვის მოსავლის აღება უკვე დასრულდა. ბაზარზე მხოლოდ ღია გრუნტისა და სათბურის ჯიშებია დარჩენილი. ადგილობრივი ჯიშის მარწყვის დასრულების შემდეგ კი, ხილის საშუალო საბითუმო ფასი 20%-ით გაიზარდა.
მარწყვის საშუალო საბითუმო ფასი ამ კვირაში 1 კილოგრამზე 6 ლარი იყო, მაშინ, როცა გასული წლის ანალოგიურ პერიოდში ხილის ღირებულება 5 ლარს არ აღემატებოდა.
როგორც საქართველოს სათბურის მარწყვის ერთ-ერთმა უმსხვილესმა მწარმოებელმა, გიორგი თავაძემ EastFruit-თან საუბარში განაცხადა, მარწყვზე მოთხოვნა კვლავაც მაღალი რჩება. მისი თქმით, მათი პროდუქცია ძირითადად საკონდიტრო ქარხნებში იყიდება, რომლებიც მზად არიან, დაუხარისხებელ 1 კილოგრამ მარწყვში 8 ლარი გადაიხადონ. მან ასევე აღნიშნა, რომ კონდიტერები ადგილობრივ მარწყვს ანიჭებენ უპირატესობას, რადგან იმპორტირებულისგან განსხვავებით, მას არ სჭირდება ტრანსპორტირება, ეს კი შედარებით ხარისხიანი პროდუქციის მიღების ერთ-ერთი საშუალებაა.
საქართველოს ფინანსთა სამინისტროს მიერ გამოქვეყნებული მონაცემებით, 2023 წლის მაისში საქართველომ თურქეთიდან 812 ტონა მარწყვი შემოიტანა, რაც 2022 წლის მაისთან შედარებით 17%-ით ნაკლებია.
