საქართველო-ყაზახეთის ვაჭრობა ისტორიულ მაქსიმუმზეა - რას ვყიდით და ვყიდულობთ
საქართველოსა და ყაზახეთს შორის სავაჭრო ბრუნვა ისტორიულ მაქსიმუმზეა.
საქართველოს სტატისტიკის ეროვნული სამსახურის მონაცემებით, 2023 წლის პირველ 5 თვეში ორ ქვეყანას შორის ვაჭრობამ 254.3 მლნ აშშ დოლარი შეადგინა, რაც წლის ამ პერიოდისთვის რეკორდული ნიშნულია და 2022 წლის იანვარ-მაისის მაჩვენებელს - 77.8 მლნ აშშ დოლარს - თითქმის 227%-ით აღემატება.
სავაჭრო ბრუნვაში უდიდესი წილი, 241.8 მლნ აშშ დოლარი ექსპორტზე მოდის, დანარჩენი, 12.5 მლნ აშშ დოლარი კი იმპორტზე. უნდა ითქვას ისიც, რომ ექსპორტი წინა წელთან შედარებით მკვეთრად, 278%-ითაა გაზრდილი, იმპორტი კი მცირედითაა შემცირებული.
უმსხვილესი საექსპორტო პროდუქტის ჩამონათვალი ასეთია:
- მსუბუქი ავტომობილები - $186.8 მლნ;
- სიგარები, სიგარილები და სიგარეტები თამბაქოს ან მისი შემცვლელებისაგან - $15.3 მლნ;
- მინერალური და მტკნარი წყლები - $6.4 მლნ;
- წყლები, მინერალურისა და დაგაზიანებულის ჩათვლით, შაქრის დანამატების შემცველობით - $6.1 მლნ;
- ყურძნის ნატურალური ღვინოები - $4 მლნ.
იმპორტით კი ყველაზე დიდი ოდენობით შემდეგი პროდუქტები შემოდის:
- ქაღალდი და მუყაო არაცარცირებული გამოსაყენებელი საწერად, საბეჭდად ან სხვა გრაფიკული მიზნებისათვის - $1.5 მლნ;
- მეტალოკონსტრუქციები შავი ლითონებისაგან და მათი ნაწილები - $1 მლნ;
- პროდუქტები საწებლების მოსამზადებლად და მზა საწებლები, მდოგვი - $990.3 ათასი;
- ბრტყელი ნაგლინი ნახშირბადიანი ფოლადისაგან სიგანით 600 მმ ან მეტი - $942.1 ათასი;
- ნაწარმი სხვა შავი ლითონებისაგან - $734.5 ათასი.
