Ostrovok.ru რუსებისთვის ყველაზე იაფ საზაფხულო მიმართულებად საქართველოს აფხაზეთთან ერთად მესამე და მეოთხე ადგილებზე ასახელებს
საქართველოსა და სომხეთში რუსები, გასულ ზაფხულთან შედარებით, ორჯერ უფრო ხშირად აპირებენ დასასვენებლად გაჩერებას. ჯავშნების რაოდენობის მიხედვით წამყვანი საზაფხულო მიმართულებები სასტუმროების ონლაინ-გაქირავების სერვისმა, Ostrovok.ru-მ შეისწავლა და გამოაქვეყნა.
ამასთან, რუსულ ონლაინ-სერვისს ტრადიციულად აფხაზეთი ცალკე მიმართულებად აქვს დასახელებული, რომელიც რუსებისთვის საზაფხულო ტურისტული მოგზაურობის ყველაზე პოპულარული მიმართულებების ტოპ 15-ეულში არის შეყვანილი. სია ასეთია: ბელარუსი, თურქეთი, აფხაზეთი, სომხეთი, იტალია, საქართველო, საფრანგეთი, ტაილანდი, ესპანეთი, ყაზახეთი, უზბეკეთი, არაბთა გაერთიანებული საემიროები, აზერბაიჯანი, ყირგიზეთი და ჩინეთი.
ონლაინ-სერვისის მონაცემებით, განსაკუთრებით, ანუ ოთხჯერ არის გაზრდილი მოთხოვნა აზერბაიჯანზე. მთლიანობაში დსთ-ის (პოსტსაბჭოთა) სივრცის ქვეყნები Ostrovok.ru-ზე საზაფხულო დაჯავშნების რაოდენობით რუსებისთვის წამყვან მიმართულებად რჩებიან. მათი წილი საზღვარგარეთის სასტუმროების მთლიანი ჯავშნებიდან 51%-ს შეადგენს.
რაც შეეხება ფასებს, ონლაინ-სერვისის მონაცემებით, ზოგადად საზღვარგარეთის სასტუმროებში ღამის დაჯავშნის საშუალო ღირებულება, გასული წლის ანალოგიურ პერიოდთან შედარებით, წლევანდელ ზაფხულს 16%-ით, 8,1 ათას რუბლამდე (93 დოლარამდე) გაიზარდა.
პოსტსაბოჭოთა სივრცის ყველაზე ბიუჯეტური (იაფი) ჯავშნების მიხედვით Ostrovok.ru-ზე საქართველო მე-3, აფხაზეთი კი უზბეკეთთან ერთად მე-4 ადგილზე არის დასახელებული. კერძოდ, დღე-ღამის ყველაზე იაფი საშუალო ფასები ასეთია:
- ყირგიზეთში - 4,4 ათასი რუბლი (51 დოლარი)
- ბელარუსში - 4,9 ათასი რუბლი (56 დოლარი)
- საქართველოში - 5, 3 ათასი რუბლი (61 დოლარი)
- უზბეკეთსა და აფხაზეთში - 5,5 ათასი რუბლი (63 დოლარი)
- ყაზახეთში - 6,4 ათასი რუბლი (74 დოლარი)
- სომხეთში - 6,6 ათასი რუბლი (76 დოლარი)
- აზერბაიჯანში - 6,7 ათასი რუბლი (77 დოლარი)
მოამზადა ლადო სულაბერიძემ