ირაკლი ღარიბაშვილი - მივყვებით ტერიტორიების მშვიდობიანი გზით დეოკუპაციისა და ქვეყნის გაერთიანების ჩვენს მიერ არჩეულ კურსს
მივყვებით ჩვენი ტერიტორიების მშვიდობიანი გზით დეოკუპაციისა და ქვეყნის გაერთიანების ჩვენს მიერ არჩეულ კურსს, - ამის შესახებ საქართველოს პრემიერ-მინისტრმა ირაკლი ღარიბაშვილმა პარლამენტში განაცხადა.
მისივე თქმით, ქვეყნის გაერთიანება არის ის მთავარი უზენაესი იდეა და მიზანი, რომლის გარშემოც ყველა უნდა გაერთიანდეს.
როგორც პრემიერ-მინისტრმა აღნიშნა, მთავრობა ოკუპირებულ ტერიტორიებზე მცხოვრებ თანამოქალაქეებს ეხმარება და იმისთვის, რომ მაცხოვრებლებს ადგილზე რაიმე პრობლემა არ შეექმნათ, ძალიან ბევრი პროგრამა გახმაურებული არ არის.
„შერიგების პოლიტიკა ოკუპირებულ ტერიტორიებთან მიმართებაში - კარგად მოგეხსენებათ ჩვენი მრავალწლიანი, სტაბილური პოლიტიკა. ჩვენ მივყვებით ჩვენს მიერ არჩეულ კურსს, ეს არის ჩვენი ტერიტორიების მშვიდობიანი გზით დეოკუპაცია და ჩვენი ქვეყნის გაერთიანება. ჩვენი ქვეყნის გაერთიანება არის ის მთავარი უზენაესი იდეა და მიზანი, რომლის გარშემოც ჩვენ ყველანი უნდა გავერთიანდეთ. ამაზე მეტი საფიქრალი დღეს ქვეყანაში არც ერთ ჯანსაღად მოაზროვნე მოქალაქეს არ აქვს გარდა ამ დესტრუქციული, უპასუხისმგებლო ოპოზიციისა.
მე მინდა ასევე ძალიან მოკლედ ვთქვა, რომ ჩვენ ძალიან ბევრს ვაკეთებთ ამ მიმართულებით, ვეხმარებით ოკუპირებულ ტერიტორიებზე მცხოვრებ ჩვენს თანამოქალაქეებს, თუმცა ძალიან ბევრი პროგრამის აფიშირება არ ხდება მიზანმიმართულად. არ გვინდა რომ ეს იყოს ერთგვარი დამაბრკოლებელი და ბარიერი ჩვენი მოქალაქეებისთვის და მათ რაღაც პრობლემები შეექმნათ ადგილზე. ჩვენ ამ პოლიტიკას გავაგრძელებთ და კიდევ უფრო გავაფართოებთ ამ მასშტაბებს”,- განაცხადა ირაკლი ღარიბაშვილმა.