როგორი იქნება ქობულეთის განახლებული ცენტრალური პარკი, რომლის სამუშაოებიც 6 მლნ ლარზე მეტი ჯდება (+ფოტო)

ქობულეთის მუნიციპალიტეტი ცენტრალური პარკის რეაბილიტაციას გეგმავს. აღნიშნულთან დაკავშირებით გამოცხადებულ ტენდერში წინადებების მიღება 19 ივლისს დასრულდა და ახლა შერჩევა/შეფასების ეტაპი მიმდინარეობს. საუბარია, აღმაშენებლის 274 ნომერში მდებარე პარკის სარეაბილიტაციო სამუშაოებზე.

ამ ეტაპზე შესყიდვების სააგენტოს ვებ-გვერდზე ტენდერში მონაწილე მხოლოდ 1 კომპანიის პირობებია საჯაროდ ატვირთული. ეს კომპანიაა „მონოლითი-2005“.

სატენდერო პირობების თანახმად, სარეაბილიტაციო სამუშაოების შესყიდვის სავარაუდო ღირებულება 6 298 000 ლარს შეადგენს, თუმცა, „მონოლითი-2005“-ის მიერ შეთავაზებული თანხა - 5 177 777 ლარია.

სატენდერო პირობების თანახმად, პარკის ტერიტორიაზე დაგეგმილია ბავშვთა გასართობის სივრცის, ამფითეატრის, მწვანე ლაბირინთის, ძაღლის სასეირნო სივრცის მოწყობა/რეაბილიტაცია და სხვა.

სამუშაოს შესრულების ვადად კი 2023 წლის 20 სექტემბრიდან 360 კალენდარული დღეა გათვალისწინებული.