სავალუტო კრიზისმა მშენებარე ბინების გაყიდვა შეამცირა
მშენებლები ლარის კურსს შიშით შესცქერიან
სავალუტო კრიზისმა მშენებარე ბინების გაყიდვა მნიშვნელოვნად შეამცირა. სამშენებლო კომპანიებში აცხადებენ, რომ უძრავი ქონების ბაზარზე გარკვეული გავლენა სამშენებლო მასალების გაძვირებამ გამოიწვია, თუმცა ამ პროცესს ბინის ფასზე გავლენა არ მოუხდენია. სამშენებლო კომპანიების წარმომადგენელთა ინფორმაციით, მშენებარე და ახალაშენებულ ბინებზე მოთხოვნა მეტ-ნაკლებად შენარჩუნდა ვაკე-საბურთალოს ტერიტორიაზე, გარეუბნებიდან კი - გლდანსა და ვარკეთილში.
არსებული მონაცემებით, თეთრი კარკასის ფასი საბურთალოზე 900-1000 აშშ დოლარია. დიდუბე-ჩუღურეთში 1 კვ/მ ბინის ღირებულება 700-დან 900 დოლარამდეა. გლდანსა და ვარკეთილში კი 500 აშშ დოლარს შეადგენს. უძრავი ქონება ყველაზე ძვირი მთაწმინდასა და სოლოლაკშია, სადაც 1 კვ/მ-ის ფართის ღირებულება 2000 აშშ დოლარია.
სამშენებლო კომპანიების წარმომადგენელთა ინფორმაციით, ეროვნული ვალუტის გაუფასურების გამო, ახალ ვალდებულებებს როგორც მომხმარებელი, ასევე ბიზნესსუბიექტებიც გაურბიან. ზოგადად, უძრავი ქონების ბაზარზე არსებული სიტუაცია არაერთგვაროვნად ფასდება. კომპანიების ერთი ნაწილი ”რეზონანსთან” საუბრისას არ მალავს, რომ სერიოზული პრობლემა აქვს, მეორე ნაწილის შეფასებით, მდგომარეობა ოდნავ გაუმჯობესდა და მომხმარებელი შოკიდან გამოვიდა.
კომპანია ”ბესტი ჯგუფის” დამფუძნებელი მალხაზ კოხრეიძე აცხადებს, რომ სავალუტო კრიზისის გამო, არათუ ახალი ვალდებულების აღება, ძველის შესრულებაც უჭირთ.
”ჩვენს კომპანიას სესხი დოლარში აქვს აღებული. სავალუტო კრიზისმა ძალიან დაგვაზარალა. გადასახადი თვეში 2000 ლარით მოგვემატა, ასეთი ზარალის მიუხედავად, ბანკის მხრიდან შეღავათზე საუბარიც არ ყოფილა. ცალკე პრობლემაა სამშენებლო მასალების გაძვირება. ფასი ისედაც არ არის კონკურენტუნარიანი და უძრავი ქონების გაძვირება არც გვიცდია. დამატებითი სესხის აღებას, დაახლოებით, 300 000 დოლარის ოდენობით ვაპირებდით. მოლაპარაკება ერთ-ერთ ბანკთან თითქმის ბოლომდე იყო მიყვანილი, მაგრამ უარი ვთქვით. იძულებული ვართ, რაც გვაქვს, იმით დავკმაყოფლდეთ, წინსვლასა და გაფართოებაზე საუბარიც ზედმეტია. ალბათ მომხმარებელიც ასე იქცევა და ვითარების გამოსწორებას ელოდება. ძალიან ცუდი მდგომარეობაა, სამრეწველო ობიექტების მიმართულება თითქმის გაჩერდა”, - აცხადებს მალხაზ კოხრეიძე.
”საბა+”-ის მენეჯერის, ირმა ბუხრაშვილის ინფორმაციით, ბოლო პერიოდში მომხმარებელი ოდნავ გამოცოცხლდა, რაც კომპანიას დაწყებული საქმის ბოლომდე მიყვანის შესაძლებლობას აძლევს.
”სავალუტო კრიზისი უძრავი ქონების ბაზარზეც ადეკვატურად აისახება. პრობლემა არსებობს და ამას გვერდს ვერავინ აუვლის, თუმცა ახლა აღარ არის ისეთი მდგომარეობა, რაც ლარის გაუფასურების პირველ ეტაპზე იგრძნობოდა. დეკემბრიდან მოყოლებული მარტამდე, მოთხოვნა თითქმის გაჩერებული იყო. ბაზარი ცოტათი გამოცოცხლდა, როგორც ჩანს, ხალხი შოკიდან ნელ-ნელა გამოდის, მაგრამ საბოლოოდ რის შესაძლებლობას მოგვცემს კურსი, წინასწარ ვერაფერს ვიტყვით. ვცდილობთ, აღებული ვალდებულება შევასრულოთ. ამ ეტაპზე ორი მშენებარე ობიექტი გვაქვს, მათგან ერთის მშენებლობას ზაფხულში დავიწყებთ. მთავარია, ეკონომიკური სტაბილურობა იგრძნობოდეს, სხვა ხელისშემშლელ მიზეზს ვერ ვხედავ. საბოლოოდ მაინც ვალუტის კურსამდე მივდივართ, რომ უძრავი ქონების ბაზარს განვითარების შესაძლებლობა მიეცეს”, - ამბობს ირმა ბუხრაშვილი.
”ბალავარი” მომხმარებლის შენარჩუნებას ჯერჯერობით ახერხებს. კომპანიის გაყიდვების მენეჯერის ნანა ქვარცხავას განცხადებით ბინებზე მოთხოვნა უმნიშვნელოდ, მაგრამ მაინც ფიქსირდება.”მცირე ფართები უკეთ იყიდება. 100 კვ/მ-ზე მეტ ფართს იშვიათად გამოუჩნდება მყიდველი. ბუნებრივია, შეფერხება გვაქვს, მაგრამ საგანგაშო მდგომარეობა არ არის. დიდი მოლოდინით ვადევნებთ თვალს ლარის კურსს. მისი დასტაბილურება ძალიან დაგვეხმარება, კიდევ უფრო დაცემით კი უძრავი ქონების ბაზარზე გამოუვალი მდგომარეობა შეიქმნება”, - ამბობს ქვარცხავა.
პრობლემა აქვს ”ევროდსაც”. კომპანიის წარმომადგენელთა შეფასებით, დოლარის გაძვირებამ ბინების რეალიზაციაზე უარყოფითად იმოქმედა, რასაც სამშენებლო მასალების გაძვირებაც დაერთო. უძრავი ქონების სააგენტოების დირექტორები საუბრობენ სხვადასხვა მიზეზზე, რამაც მშენებარე და ახალ ბინებზე მოთხოვნის შემცირება განაპირობა. პირველ რიგში, ეს სავალუტო ცვლილებებს უკავშირდება. ეროვნული ვალუტის გაუფასურებამ და იპოთეკურ სესხებზე ხელმისაწვდომობის გართულებამ უძრავი ქონების ბაზარს გარკვეული პრობლემა შეუქმნა.
”რეალიზაციაზე სხვადასხვა ფაქტორი მოქმედებს, ასეთია თუნდაც ქვეყნის ეკონომიკური მდგომარეობა, ფულად-საკრედიტო პოლიტიკა, ინვესტიციები და სხვა. ფასზე გავლენა კონკურენციამაც განსაზღვრა, ბოლო დროს ბაზარზე ბევრი კომპანიაა, რომელიც მშენებლობებითა და ბინების რეალიზაციითაა დაკავებული. ფაქტობრივად, დიდია მიწოდება, მოთხოვნა - ნაკლები და ამგვარმა დისბალანსმა ფასზეც ადეკვატურად იმოქმედა,” - აცხადებს კომპანია ”სიგმას” ხელმძღვანელი ზურაბ ლაჩაშვილი.
მარი ჩიტაია
წყარო: გაზეთი ”რეზონანსი”