Inter RAO აზერბაიჯანს, ჩინეთსა და მონღოლეთს ელექტროენერგიის ექსპორტის შეწყვეტით ემუქრება - რიგში საქართველო და თურქეთია

რუსული ენერგოგიგანტი, Inter RAO აანონსებს, რომ ექსპორტირებულ ელექტროენერგიაზე ფასების ზრდა სამომავლოდ საქართველოსა და თურქეთსაც შეეხება, თუმცა ამ ქვეყნებში მიწოდება ოქტომბერში დაგეგმილი არ ყოფილა. ამის შესახებ Inter RAO-ს წარმომადგენელმა, ალექსანდრა პანინამ „კომერსანტს“ განუცხადა.

ამასთან, Inter RAO 1-ლი ოქტომბრიდან მთლიანად შეაჩერებს ან შეზღუდავს ელექტროენერგიის ექსპორტს აზერბაიჯანში, ჩინეთსა და მონღოლეთში, თუ კონტრაგენტები 7%-ით გაზრდილ ფასს არ გადაიხდიან, რაც რუსეთში იმავე ოდენობით გაზრდილმა საექსპორტო გადასახადმა გამოიწვია. პანინას თქმით, ენერგოკომპანიამ აზერბაიჯანს, ჩინეთსა და მონღოლეთს ფასის 7%-იანი ზრდის შესახებ უკვე აცნობა.

„თუ ხვალ თანხმობას ვერ მივიღებთ, ჩვენ შეზღუდვებს დავაწესებთ ან მოცულობას მთლიანად შევწვყვეტთ,” - აცხადებს პანინა.

21 სექტემბერს ფედეერაციის მთავრობამ მიიღო დადგენილება, რომლის მიხედვითაც, 1-ლი ოქტომბრიდან 2024 წლის ბოლომდე საქონლის ფართო სპექტრზე 4-7%-იანი საექსპორტო გადასახადი ერთი დოლარის 80 რუბლზე და მეტი გაცვლითი კურსით ამოქმედდება, ანუ ბაჟის განაკვეთი რუბლის დაცემასთან ერთად გაიზრდება. გამონაკლის საქონელს შორის არის ნავთობი, გაზი, მარცვლეული და ხე-ტყე.

„წელს, აპრილ-მაის-ივნისში მიწოდება თურქეთში შევასრულეთ. საქართველოსა და თურქეთში მიწოდება იქნება, თუმცა ამჟამად არ გვაქვს… ასევე, პარალელური მუშაობის ფარგლებში, მიმდინარეობს მიწოდება აზერბაიჯანში, ხოლო, დაახლოებით, 20 მეგავატი „სამხრეთ ოსეთს“ მიეწოდება,” - აცხადებს პანინა.

ცნობისთვის: კომპანია „თელასის” აქციების საკონტროლო პაკეტს (75.108%) ნიდერლანდების სამეფოში რეგისტრირებული კომპანია Silk Road Holdings B.V ფლობს, რომლის დამფუძნებელიც რუსული Inter RAO-ა. ამასთან, 24.529%-ს შპს „ბეტს ენერჯი გრუპი,“ ხოლო 0.363%-ს დანარჩენი აქციონერები ფლობენ.

დივერსიფიცირებული ჰოლდინგი, Inter RAO რუსეთში ელექტროენერგიის ექსპორტ-იმპორტის ერთადერთი ოპერატორია. 2023 წლის ბოლოსთვის რუსეთიდან ელექტროენერგიის ექსპორტის მთლიანი მოცულობა, საექსპორტო გადასახადების შემოღებამდე, 10,5 მილიარდ კვტ/სთ-ად იყო შეფასებული, რაც 2022 წლის მაჩვენებელზე ნაკლებია. რუსული ელექტროენერგიის მიწოდების მოცულობით წელს პირველ ადგილს ყაზახეთი, მეორეს კი ჩინეთი დაიკავებს.

2022 წლის ბოლოსთვის Inter RAO-ს მთავარი აქციონერი „როსნეფტეგაზი“ (26,37%) იყო, ხოლო Inter RAO Capital-ის წილი 29,56%-ს შეადგენდა. ასევე, 2021 წლის ბოლოსთვის 8,57%-იანი წილი ფედერალურ ქსელურ კომპანია „როსსეტის“ ეკუთვნოდა, ხოლო 34,24%-იანი წილი თავისუფალ მიმოქცევაში იყო. ამ აქციების შესახებ უახლესი მონაცემები გასაჯაროვებული არ არის.

იხილეთ ასევე:

ახალი საექსპორტო გადასახადი - „თელასის“ რუსი მეწილე ელექტროენერგიის გაძვირებას არ გამორიცხავს

ელექტროენერგიის იმპორტში რუსეთის წილი გაიზარდა - როგორია ბოლო 5 წლის მონაცემები

მოამზადა ლადო სულაბერიძემ