რა სასურსათო პროდუქტებს ვყიდით არაბთა გაერთიანებულ საამიროებში, სადაც სულ მალე საქართველოსთვის ნულოვანი ბაჟი ამოქმედდება
თავისუფალი ვაჭრობის ფარგლებში, არაბთა გაერთიანებულ საამიროებში ქართული პროდუქციის 98%-მდე ნულოვანი ბაჟით შევა. როგორც ეკონომიკის მინისტრმა, ლევან დავითაშვილმა განაცხადა, ხელშეკრულებას ხელი 10 ოქტომბერს მოეწერება, რითაც ქვეყნისთვის 9- მილიონიანი ბაზარი გაიხსნება.
„ბიზნესპრესნიუსი“ დაინტერესდა, რა სასურსათო პროდუქტებს ყიდის ამ ეტაპზე საქართველო არაბთა გაერთიანებულ საამიროებში.
საქსტატის მონაცემებით, წელს 8 თვეში 3,726 მლნ აშშ დოლარის საკვები და სასმელი პროდუქტი გავიდა, რაც წინა წლის მაჩვენებელზე თითქმის, 27%-ით მეტია. 2022 წლის იანვარ აგვისტოში, საქართველოდან არაბთა გაერთიანებულ საამიროებში ექსპორტირებულმა სასურსათო პროდუქტების მოცულობამ 2,943 მლნ აშშ დოლარი შეადგინა.
რაც შეეხება კონკრეტულად ადგილობრივ ექსპორტს, წელს იანვარ-აგვისტოში 2,871 მლნ აშშ დოლარის საკვები და სასმელი პროდუქტი გავიდა, რაც მთლიანი ადგილობრივი ექსპორტის მხოლოდ 0,4%-ს შეადგენს. წელს 8 თვეში საკვები პროდუქტების და სასმელების ადგილობრივმა ექსპორტმა 649,654 მლნ დოლარი შეადგინა.
ტოპ-10 ექსპორტირებული პროდუქტი წელს ასე გამოიყურება:
- ფრინველის კვერცხი, ნაჭუჭით, ახალი, დაკონსერვებული ან მოხარშული - 787.9 ათასი აშშ დოლარი
- თხილი და სხვა კაკალი - 397.2 ათასი აშშ დოლარი
- ეთილის სპირტი არადენატურირებული, სპირტის კონცენტრაციით 80 მოც.%-ზე ნაკლები, სპირტიანი სასმელები - 201.9 ათასი აშშ დოლარი
- ყურძნის ნატურალური ღვინოები - 187.8 ათასი აშშ დოლარი
- ხორცი მსხვილფეხა რქოსანი პირუტყვის, გაყინული - 111.7 ათასი აშშ დოლარი
- ხილისა და ბოსტნეულის წვენები - 91.2 ათასი აშშ დოლარი
- ხორცი ცხვრის ან თხის, ახალი, გაცივებული ან გაყინული - 82 ათასი აშშ დოლარი
- მზა ან დაკონსერვებული თევზი; ზუთხის ხიზილალა და მისი შემცვლელები - 40.3 ათასი აშშ დოლარი
- წყლები, მინერალურისა და დაგაზიანებულის ჩათვლით, შაქრის დანამატების შემცველობით - 29.8 ათასი აშშ დოლარი
- ბოსტნეული ახალი ან შეყინული - 21.6 ათასი აშშ დოლარი
