მსოფლიოს ხუთი უმდიდრესი ადამიანის ქონება 2020 წლის შემდეგ თითქმის გაორმაგდა
Oxfam-ის უთანასწორობის ყოველწლიური ანგარიშის თანახმად, 2020 წლიდან მსოფლიოს ხუთი მილიარდერის ქონება 114%-ით გაიზარდა და ჯამში 869 მილიარდ დოლარს მიაღწია.
CNN business-ი ამ მილიარდერების ვინაობის შესახებ წერს.
- ილონ მასკი, SpaceX-ისა და Tesla-ს დამფუძნებელი. მისი ქონება 2020 წლის მარტის შემდეგ 737%-ით გაიზარდა. გასული წლის ნოემბერში მასკის ქონება 245 მილიარდ დოლარს შეადგენდა.
- ბერნარდ არნო, ფრანგული ლუქს-კლასის საქონლის LVMH-ს მფლობელი - +111%, 191 მლრდ დოლარი.
- ჯეფ ბეზოსი, „ამაზონის“ დამფუძნებელი - + 24%, 167 მლრდ დოლარი
- ლარი ელისონი, Oracle-ის დამფუძნებელი - +107%, 145 მლრდ დოლარი
- უორენ ბაფეტი, Berkshire Hathaway-ის დამფუძნებელი - +48%, 119 მლრდ დოლარი.
თავის ანგარიშში Oxfam-ი ამტკიცებს, რომ ბიზნესი დიდ მოგებას იღებს, რაც შეძლებული ადამიანების კიდევ უფრო გამდიდრებას იწვევს. მსოფლიოს 10 უმსხვილესი საჯარო კომპანიიდან შვიდს ან მილიარდერი აღმასრულებელი დირექტორი ან მილიარდერი აქციონერი ჰყავს.
ორგანიზაცია მოუწოდებს მთავრობებს, ჩაერიონ მონოპოლიების დასაშლელად, დაბეგრონ კორპორატიული მოგება და რაც მთავარია, საზოგადოებრივი საქონლისა და სერვისების ახალ ეპოქაში ინვესტიციები განახორციელონ.
