„ყველაფერი თბილისიდან უნდა ამოვიტანოთ, მომარაგება მინიმუმ 30%-ით გაძვირდა - ბიზნესი გუდაურში მაღალი ფასების მიზეზებს განმარტავს
ბაკურიანსა და გუდაურში, ზამთრის საკურორტო სეზონი აქტიურ ფაზაშია შესული, რის გამოც კურორტებზე პროდუქტების, თუ სარესტორნო ფასები აწეულია. დამსვენებლების თქმით, წყალი 5 ლარი ღირს, პური 10 ლარამდე, პიცა კი 45 ლარი. ამ საკითხთან დაკავშირებით, სასტუმრო-რესტორანი „ათი ამბავი გუდაურის“ მფლობელი, სლავა გოგოხია „ბიზნესპრესნიუსთან“ საუბარისას ამბობს, რომ ფასები მატება ძალიან ბევრი მიზეზითაა განპირობებული, რაც დაკავშირებულია გუდაურის კურორტის სპეციფიკასთან, პერსონალის ხელფასებთან და პროდუქტების ზოგად გაძვირებასთან.
„გუდაურში პრობლემას დისტრიბუცია წარმოადგენს. ყველაფერი თბილისიდან უნდა ამოვიტანოთ, ადგილზე ვერაფერს ვერ იყიდით. ასევე პერსონალს მეტი ანაზღაურება უნდა, თბილისის ხელფასზე არავინ არ იმუშავებს. ასევე ყველა დასაქმებულს სჭირდება დაბინავება, ყველას ცალ-ცალკე სურს ცხოვრება, ასევე სამჯერადი კვება პერსონალისთვის. ამას კომუნალურები ემატება და მოგეხსენებათ, გუდაურში მუდმივი სიცივის გამო, სულ დიდი ხარჯები მოდის გაზზე, დენსა და წყალზე. ეს, რა თქმა უნდა, ფასზე აისახება. ჩაი ნამდვილად არ უნდა ღირდეს 17, 20 და 25 ლარი, ამაში ვეთანხმები საზოგადოებას, მაგრამ 40 ლარად პიცა და ხაჭაპური არ მიკვირს, რადგან რეალურად, პროდუქტთა ფასებიც გაძვირებულია, გუდაური კი სეზონური კურორტია, სადაც სეზონი 2 თვეს გრძელდება“, - განმარტავს სლავა გოგოხია „ბიზნესპრესნიუსთან“.
სასტუმროსა და რესტორნის მფლობელი ჩვენთან საუბარისას ასევე აღნიშნავს, რომ იგი ტურისტების სიმცირეს არ უჩივის.
„ჩემს ობიექტზე, სასტუმროში 10 პროცენტიც არ არიან რუსები. შეიძლება გუდაურში ზოგადად იყვნენ, რადგან მესმის რუსული საუბარი, მაგრამ ყველა ვინც რუსულად საუბრობს, რუსი არ არის. ამ ენაზე საუბრობენ ყაზახებიც, უკრაინელებიც და კიდევ სხვა ერის წარმომადგენლებიც, ამიტომ იმის ხაზგასმა, რომ ყველა, ვინც რუსულად საუბრობს, რუსია, ჩემი აზრით, ილუზიურია.
ზოგადად, დამსვენებლები თითქმის იმ რაოდენობით არიან, რა რაოდენობითაც წინა წელს იყვნენ“, - აღნიშნავს სლავა გოგოხია.
შედარებით განსხვავებულ აზრს გამოთქვამს კაფე CUB-ის დამფუძნებელი, ნინო ხაჟომია, რომელიც Ambebi.ge-სთან საუბარში ამბობს, რომ გავრცელებული ინფორმაცია გუდაურში არსებული ფასების შესახებ გაზვიადებულია და "ვერ ხვდება, ვის ამოძრავებს სამთო კურორტზე სეზონის ჩაგდების სურვილი", მაგრამ ამასთანავე საუბრობს მომარაგების ფასის მატებასა და ტურისტების სიმრავლეზე.
"მომარაგება წელს მინიმუმ 30%-ით გაიზარდა, რაც შეეხება ტურისტებს, ძალიან ბევრია. ტყუილია, რომ გუდაურში ხალხი არ არის, მთას, გუდაურს, მესტიას გოდერძის სეზონზე 2-კვირიანი ჩავარდნები ახასიათებს. მე რვა წელია მთაში ვარ და სულ ასეა. 14 იანვრიდან თვის ბოლომდე ნაკლები ხალხია. თებერვლის ბოლოს იქნება ასევე ათი დღე ნაკლები ხალხი და მარტიდან ისევ გავივსებით. ეს ყველამ ვიცით, ვინც მთაში ვოპერირებთ. ვემზადებით იმისთვის, რომ ისევ იყოს ისეთი შემოტევა, როგორიც გვქონდა ახალი წლის პერიოდში", - განაცხადა ნინო ხაჟომიამ.
კაფის დამფუძნებლის თქმით, ტურისტები ძირითადად არაბთა საამიროებიდან არიან, მაგრამ მათ ევროპული წარმომავლობა აქვთ, ხოლო რუსთა რაოდენობა ძალიან შემცირებულია.
"არაბთა გაერთიანებული საამიროებიდან არიან, თუმცა არ არიან არაბები. ესენი არიან ევროპელები, რომლებმაც არაბთა საამიროებში გადაიტანეს ბიზნესი საგადასახადო ლიბერალური პოლიტიკის გამო და რაც არ უნდა გასაკვირი იყოს, მიუხედავად ომისა, ძალიან ბევრია ისრაელიდან. საოცრებაა და რუსები არიან ძალიან ცოტა, შარშანდელისგან განსხვავებით. სავარაუდოდ, ვინც აქ დარჩა, ფული აღარ აქვს და ვერ ისვენებს, ან თავად გახსნეს რაღაცები და თავიანთ ხალხთან დადიან.", - ამბობს ნინო ხაჟომია.
