სად აშენდება და როგორი შეიძლება იყოს თსუ-ს ახალი სასწავლო-ადმინისტრაციული კორპუსი (+ფოტო)

თსუ პირველი და მეორე კორპუსების მიმდებარედ ახალი სასწავლო-ადმინისტრაციული შენობის მშენებლობა იგეგმება.

თბილისის სახელმწიფო უნივერსიტეტის ცნობით, კორპუსის პროექტირების კონკურსი უკვე დასრულდა. გამოცხადებულ კონკურსში რვა პრეტენდენტმა (ესენია: შპს „ეი-დი-ეს“; შპს „არქიკოლეგიუმი“; შპს „გრინსტუდიო“; შპს „ნს სტუდიო“; შპს „ვოლ“; შპს „ტასჰაბი“; შპს „ნიუ სითი დეველოფმენთ“; შპს „მორფ“) წარადგინა პროექტები, რომელთაგან გამარჯვებული 5 თებერვალს გამოვლინდება.

„კონკურსის შედეგად წარმოდგენილი 8 პროექტიდან არქიტექტორების, ხელოვნებათმცოდნეებისა და უნივერსიტეტის წარმომადგენლებისგან შემდგარი კომისია შეარჩევს გამარჯვებულ პროექტს, რომელიც ფუნქციურად და ვიზუალურად დააკმაყოფილებს ახალი კორპუსის დანიშნულებას, არ შეცვლის თსუ-ის პირველი და მეორე კორპუსების ისტორიულად ჩამოყალიბებულ ლანდშაფტს. საპროექტო კონცეფციაში გათვალისწინებული უნდა იყოს ტერიტორიის ისტორიულ-არქიტექტურული კონტექსტი და მახასიათებლები “, - ნათქვამია ინფორმაციაში.