ბინები, მანქანები, ნახატები - რა ქონებას ფლობს თბილისის მერი
დედაქალაქის მერმა, კახა კალაძემ ქონებრივი დეკლარაცია მიმდინარე წლის 31 იანვარს განაახლა.
დოკუმენტის მიხედვით, მის საკუთრებაშია: 4 ბინა, ამათგან 2 თბილისში, ხოლო 2 უკრაინაში, 3 ავტოფარეხი, 5 მიწის ნაკვეთი, თბილისსა და სამტრედიაში, ასევე, არასაცხოვრებელი ფართი სამტრედიაში.
გარდა ამისა, 5 ავტომობილი, კერძოდ, SMART BRABUS, TOYOTA CAMRY, PORSCHE 911, Tesla model 3, TOYOTA LC 300, რომელთა ღირებულება 40 000 დოლარიდან იწყება და 150 000 აშშ დოლარამდე ადის.
დოკუმენტის მიხედვით, დედაქალაქის მერის საკუთრებაშია ასევე, 5 მოტოსატრანსპორტო საშუალება, მათი ღირებულება 10 000 დოლარიდან 28 000 ევრომდე მერყეობს. ასევე 6 ფერწერული ტილო, რომელთაგან ერთი საჩუქრად გადაეცა, ხოლო ხუთ მათგანში ჯამში, 245 000 აშშ დოლარი აქვს გადახდილი.
თბილისის მერის მიერ შევსებული დეკლარაციის მიხედვით, მისი მეუღლის სახელზეა 4 ბინა თბილისსა და დუშეთის რაიონში.
როგორც დოკუმენტშია აღნიშნული, კალაძეს თბილისის მერის სტატუსით, ხელფასის სახით, 2023 წელს აღებული აქვს 75 264 ლარი.
რაც შეეხება ფინანსურ მდგომარეობას, ქონებრივი დეკლარაციის შევსების მომენტში კახა კალაძე ფლობდა: „საქართველოს ბანკის“ საბარათე ანგარიშებზე ჯამში - 16 029 აშშ დოლარს და 23 502,12 ევროს, „ბანკი ქართუზე“ – 5 382,63 აშშ დოლარსა და 2 501,94 ევროს, მიმდინარეზე - 576,13 ლარს, 203,1 აშშ დოლარს და 164,24 ევროს, "ბაზის ბანკის" მიმდინარეზე - 48,53 ევროს. ხოლო, დანაზოგის სახით 12 000 აშშ დოლარს და 15 000 ევროს.
ამავე დოკუმენტის მიხედვით, 2023 წელს თბილისის მერს ქველმოქმედებაზე დახარჯული აქვს 250 000 ლარი.
