სოციალური ქსელები instagram-ი და Facebook-ი 5 მარტს 2 საათზე მეტი დროით გაითიშა. Facebook-ის მილიონობით მომხმარებელი ვერ ახერხდებდა საკუთარ ანგარიშზე შესვლას, რადგან სისტემა წერდა, რომ "არასწორი პაროლი" შეჰყავდათ.
როგორც სოციალური ქსელების მფლობელი კომპანია META განმარტავს, ეს გამოიწვია "კონფიგურაციის გადამოწმების ავტომატიზებულმა სისტემამ და სისტემაში არსებულმა ხარვეზმა".
"ფეისბუქი გათიშული იყო დაახლოებით 2,5 საათის განმავლობაში. ეს ყველაზე უარესი გათიშვაა, რაც კი გვქონია ბოლო 4 წლის განმავლობაში. კონფიგურაციის გადამოწმების ავტომატიზებულმა სისტემამ გაცილებით მეტი ზიანი გამოიწვია, ვიდრე დააფიქსირა. ამ სისტემის მიზანია, შეამოწმოს კონფიგურაცია და იპოვოს ხარვეზები. ამ კონკრეტულ შემთხვევაში, სისტემამ არ იმუშავა. ამ ყველაფრის შეჩერება საკმაოდ რთული პროცესი იყო. საჭირო გახდა სოციალური ქსელების გამორთვა. შემდეგ კი ნელ-ნელა დავუშვით ადამიანები საიტზე," - ნათქვამია განცხადებაში.
გუშინდელი გათიშვის მერე, არაერთი მომხმარებელი წერდა, რომ მათ სხვა პირების პროფაილზე მიიღეს წვდომა.
კიბერუსაფრთხოების ექსპერტი ანდრო გოცირიძე, მოქალაქეებს ურჩევს, თუ როგორ გადაამოწმონ და აიცილონ თავიდან საკუთარ „ფეისბუქ“ გვერდებზე უცხო პირების დაშვება.
„ფეისბუკზე წვდომა ხარვეზით აღდგა, ისე, რომ დამახსოვრებულ პროფაილებში (მარტივად, დამახსოვრებული პაროლით შესვლის ფუნქცია თქვენს კომპიუტერში ან ტელეფონზე) შეიძლება უცხო ადამიანის პროფაილი გამოჩნდეს, სადაც უპრობლემოდ შეხვალთ პაროლისა და ორმაგი ავტორიზაციის გარეშე. სავარაუდოა, რომ თქვენი პროფაილიც ასევე "გამოუჩნდა" ვიღაცას და მარტივად მიიღო წვდომა. არის სხვა სისუსტეებიც. მაგალითად, ჩემ პროფაილზე წვდომა აღდგა ორი წლის წინ შეცვლილი ტელეფონიდან.
არასანქცირებული წვდომის თავიდან ასაცილებლად, შედით password and security ბლოკში, დაათვალიერეთ where you’re logged in დევაისები (იმ ტელეფონების და კომპიუტერების ჩამონათვალი, რომლებშიც ამ მომენტში, გახსნილია თქვენი ფეისბუქი) და ამოშალეთ ყველა დევაისი, რომელსაც არ გინდათ ჰქონდეს წვდომა.
ასევე, გადაამოწმეთ, ისევ არის თუ არა მონიშნული ორმაგი ავტორიზაციის მოთხოვნა სეთინგებში და მთლად "საკონტროლო გასროლისთვის" შეცვალეთ პაროლიც, რის შემდეგაც არ დაგავიწყდეთ "ყველა ხელსაწყოზე სესიის დასრულების" მონიშვნა.
თუ რაიმე ვერ ავხსენი მარტივად, მომწერეთ: ადამიანები ვართ და არაფერი ადამიანური არ არის უცხო, ყველას გვაქვს რაღაც ისეთი სოცქსელში, რაც არ გვინდა, რომ სხვამ ნახოს,“- ამბობს ანდრო გოცირიძე.