ქართველი ფეხბურთელის ხვიჩა კვარაცხელიას ფასი დღევანდელი თამაშის მეტოქე ნაკრების, საბერძნეთის ყველაზე ძვირად შეფასებული ფეხბურთელის ღირებულებას თითქმის 4-ჯერ აღემატება
transfermarkt.com-ზე განთავსებული ინფორმაციის მიხედვით, ამ დროისთვის ხვიჩა კვარაცხელია საბაზრო ღირებულება 80 მლნ ევროს შეადგენს, საბერძნეთის ნაკრების ყველაზე ძვირად ღირებული ფეხბურთელი ვანგელის პავლედისის კი 22 მლნ ევროს. ასევე 22 მლნ ევრო ღირს transfermarkt-ზე სიის მეორეადგილოსანი ბერძენი ფეხბურთელი კონსტანტინოს ციმიკასი. რაც შეეხება ქართველ მეორე ადგილოსან გიორგი მამარდაშვილს მისი ღირებულება 35 მლნ ევროს შეადგენს.
ყველაზე ძვირად ღირებული ფეხბურთელების სამეულს კი კრავს - ქართველი გიორგი მიქაუტაძე 9 მლნ ევროთი და ბერძენი - კონსტანტინოს მავროპანოსი 18 მლნ ევროთი.
რაც შეეხება ნაკრებების ღირებულებას, transfermarkt-ის მონაცემებით, საქართველოს ნაკრების ღირებულება 150.350 მლნ ევროა, საბერძნეთის ნაკრების კი 151.850 მლნ ევრო.
დღეს, 26 მარტს დამოუკიდებელი საქართველოს ფეხბურთის ისტორიაში ერთ-ერთი ყველაზე მნიშვნელოვანი მატჩია. საქართველოს ეროვნული ნაკრები "ერთა ლიგის" ფინალში საბერძნეთს დაუპირისპირდება. გამარჯვების შემთხვევაში, ჩვენი გუნდი ისტორიაში პირველად იასპარეზებს ევროპის ჩემპიონატზე. მატჩი თბილისში, "დინამო არენაზე" 21:00 საათზე დაიწყება.