კონტეინერების მსოფლიო ინდექს Drewry’s-მა ერთ კვირაში 3%-ით მოიკლო. კერძოდ, 40-ფუტიანი ერთი კონტეინერის გადაზიდვის ტარიფმა 28 მარტის მდგომარეობით 2,929 დოლარი შეადგინა, მაშინ, როცა 21 მარტს 3,010 დოლარი ღირდა. მონაცემებს Drewry Shipping Consultants ავრცელებს.
თუმცა გასული წლის ანალოგიურ კვირასთან შედარებით, ინდექსი 71%-ით გაიზარდა. ამასთან, 40-ფუტიან ერთ კონტეინერზე 28 მარტის 2,929-დოლარიანი მაჩვენებელი 2019 წლის პანდემიამდელ საშუალო მაჩვენებელზე, ანუ 1,420 დოლარზე 106%-ით მეტია.
ყველაზე მაღალ ნიშნულს Drewry’s-ის ინდექსმა 25 იანვარს მიღწია, როცა 40-ფუტიანი ერთი კონტეინერის გადაზიდვის ტარიფმა 3,964 დოლარი შადგინა, ხოლო მინიმალური, 1,342-დოლარიანი ფასი 2023 წლის 26 ოქტომბერს დაფიქსირდა.
მიმდინარე წელს საშუალო ინდექსი 40-ფუტიან კონტეინერზე 3,413 დოლარია, რაც 10-წლიან საშუალო მაჩვენებელს, ანუ 2,704 დოლარს 709 დოლარით აღემატება. საშუალო მაჩვენებელი 2020-22 წლების კოვიდპანდემიის განსაკუთრებულ პერიოდში გაიზარდა.
Drewry გადაზიდვის სპოტური ფასების შემცირებას უახლოეს კვირაშიც მოელის.
ცნობისთვის: თებერვალში ევროკომისარმა ეკონომიკურ საკითხებში, პაოლო ჯენტილონიმ განაცხადა, რომ წითელ ზღვაში თავდასხმების შედეგად აზიიდან ევროპაში საქონლის მიწოდების დრო 10-15 დღით, ტრანსპორტირების ღირებულება კი 400%-ით გაიზარდა. ამასთან, საერთაშორისო საზღვაო ორგანიზაციის (International Maritime Organization-IMO) მონაცემებით, წითელ ზღვაში დაძაბულობის ფონზე სუეცის არხზე 36%-ით ნაკლები გემი მოძრაობს, ხოლო ტვირთი 60%-ზე მეტად არის შემცირებული. მნიშვნელოვნად გაიზარდა გემების დაზღვევის ღირებულება, საწვავის ხარჯი და ეკიპაჟების დატვირთვის დონე.
მოამზადა ლადო სულაბერიძემ