კაპიტალიზაცია მშპ-ის მიმართ - არიან თუ არა G20-ის ქვეყნებში სახელმწიფოზე მდიდარი კომპანიები
საუდის არაბეთის ნავთობისა და გაზის კომპანია, Saudi Aramco ერთადერთი კომპანიაა G20-ის ქვეყნებიდან, რომლის კაპიტალიზაციაც ქვეყნის მშპ-ს აღემატება. კერძოდ, Saudi Aramco-ს კაპიტალიზაციამ გასულ კვირას 1,933 ტრლნ დოლარი შეადგინა და ქვეყნის მშპ-ს 1,7-ჯერ გადააჭარბა.
შემდეგი 379,9 მლრდ დოლარით სამხრეთ კორეული Samsung-ია, რომლის კაპიტალიზაციაც ქვეყნის მშპ-ის 22%-ს შეადგენს. მესამეზე 82,7 მლრდ დოლარით არგენტინული სავაჭრო გიგანტი, MercadoLibre-ია. კომპანიის სავაჭრო ღირებულება არგენტინის მშპ-ის 14%-ია.
პირველ ხუთეულში, ასევე, მოხვდნენ ფრანგული Moët Hennessy Louis Vuitton 419,4 მლრდ დოლარით, ანუ საფრანგეთის მშპ-ის 13%-ით, ამერიკული Microsoft 3,022 ტრლნ დოლარის კაპიტალიზაციით, რაც აშშ-ის მშპ-ის 11%-ს შეადგენს და სამხრეთ აფრიკის ტექნოლოგიური გიგანტი, Naspers, რომლის 36,2 მლრდ დოლარის კაპიტალიზაცია ქვეყნის მშპ-ის 10%-ია.
ასევე, მშპ-სთან კაპიტალიზაციის ყველაზე დიდი თანაფარდობით შემდეგი კომპანიები გამოირჩევა:
- BHP Group (ავსტრალიის სამთო კომპანია) - 142,4 მლრდ დოლარი, მშპ-ის 8%
- Toyota (იაპონური ავტოკონცერნი) - 315,2 მლრდ დოლარი; ასევე, მშპ-ის 8%
- AstraZeneca (დიდი ბრიტანეთ ) - 236,8 მლრდ დოლარი; მშპ-ის 7%
- Royal Bank of Canada (კანადური ბანკი) - 143,2 მლრდ დოლარი; მშპ-ის 6%
- Reliance Industries (ინდური კონგლომერატი) - 231,1 მლრდ დოლარი; ასევე, მშპ-ის 6%
მშპ-ის მიმართ 5%-იანი ბარიერი G20-ის დანარჩენი ქვეყნების უმსხვილესმა კომპანიებმა ვერ გადალახეს. კერძოდ, ეს არის ინდონეზიური Bank Central Asia 75,4 მლრდ დოლარით, გერმანული ტექნოლოგიური კომპანია, SAP-ი 214,1 მლრდ დოლარითა და ბრაზილიური ნავთობის გიგანტი, Petrobras 108 მლრდ დოლარით.
ეროვნული მშპ-ის მიმართ სათითაოდ 4%-ს შეადგენს თურქული ბანკის, QNB Finansbank-ის 42,5 მლრდ დოლარისა და რუსული Sberbank-ის 72,3 მლრდ დოლარის კაპიტალიზაცია.
იტალიურ საავტომობილო გიგანტ Ferrari-ის 77,5 მლრდ დოლარისა და მექსიკურ საცალო მოვაჭრე Walmex-ის 66,8 მლრდ დოლარის კაპიტალიზაცია ამ ქვეყნების მშპ-ის მიმართ სათითაოდ 3%-ს შეადგენს.
ჩინური ტექნოლოგიურ გიგანტ Tencent-ის 444 მლრდ დოლარის კაპიტალიზაცია ეროვნული მშპ-ის 2%-ია.
აღსანიშნავია, რომ G20-ის გარე სახელმწიფოებს შორის დანია, ასევე, ერთადერთი ქვეყანაა, რომლის მშპ-იც მისი უმსხვილესი კომპანიის სავაჭრო ღირებულებაზე ნაკლებია. ეს არის დანიური სამედიცინო გიგანტი, Novo Nordisk, რომლის 567,56 მლრდ დოლარის კაპიტალიზაციაცა ქვეყნის მშპ-ზე 1,4-ჯერ მეტია.
მოამზადა ლადო სულაბერიძემ